تۇركىمەنستان ايەلدەردىڭ كولىك جۇرگىزۋىنە تىيىم سالدى

ەندى تۇركىمەنستاندا جۇرگىزۋشى كۋالىگى بولعان كۇننىڭ وزىندە ايەلدەرگە كولىك جۇرگىزۋگە تىيىم سالىنادى. بۇل تۋرالى habartm.org سايتى جازدى. 

ايەلدەردىڭ كولىك جۇرگىزۋىنە تىيىم سالۋ جۇمىسى 2017 جىلدىڭ جەلتوقسان ايىنان باستالعان. باستاپقىدا تەك ايىپپۇل سالىناتىنى تۋرالى ەسكەرتۋ جاسالعان. الايدا وسى جىلدىڭ قاڭتار ايىنان باستاپ جول پوليتسياسى قىزمەتكەرلەرى ايەل جۇرگىزۋشىلەرگە قاتىستى شارالاردى قاتاڭداتىپ، ولاردان جۇرگىزۋشى كۋالىگىن الىپ، كولىكتى ايىپپۇل تۇراعىنا قويا باستاعان.

اشحابادتا تۇراتىن ايەلدەردىڭ سوزىنە قاراعاندا، باستاپقىدا كوپشىلىگى مۇنى قالجىڭعا بالاعان. الايدا تىيىم سالۋ كۇشىنە ەنگەندىكتەن، قازىر ايەلدەر كولىك جۇرگىزۋدەن قورقا باستاعان. ءتىپتى مەملەكەتتىك مەكەمەلەردە جۇمىس ىستەيتىن ايەلدەردەن كولىك جۇرگىزبەۋ تۋرالى قولحات الىنعان.

بۇدان بۇرىن ىشكى ىستەر ءمينيسترى ىسكەندىر مۋليكوۆ تۇركىمەنستان باسشىسىنا ەلدەگى جول كولىك اپاتتارىنىڭ كوبى ايەل جۇرگىزۋشىلەردىڭ قاتىسۋىمەن بولاتىنى تۋرالى ستاتيستيكانى تانىستىرعان. وسىدان كەيىن پرەزيدەنت قۇربانعۇلى بەردىمۇحامەدوۆ مينيسترگە  جاعدايدى رەتتەۋ تۋرالى تاپسىرما بەرگەن.

“The Qazaq Times”