تۇركيا پرەزيدەنتى رەجەپ تايىپ ەردوعان فرانتسيادا رەسمي ساپاردا بولدى، ءارى سول ەلمەن تۇركيا اراسىنداعى قارىم-قاتىناستى جاقسارتاتىنىن ايتتى. بۇل تۋرالى سول ەلدىڭ «انادولى» اقپاراتتىق اگەنتتىگىنىڭ  رەسمي سايتى جازدى.

ەردوعان فرانتسيادا TF1 جانە LCI ارنالارىنىڭ سۇحباتىن قابىلداعاندا، تۇركيا ەۋروپا ەلدەرى اراسىندا فرانتسيامەن تاتۋ قارىم-قاتىناستى ساقتاپ كەلە جاتقانىن العا تارتقان. ول جانە فرانتسيامەن بىرلەسە وتىرىپ، تەرروريزمگە قارسى كۇرەس، بوسقىندار ماسەلەسى جانە ورتا شىعىس قايشىلىقتارىن شەشۋگە تىرىساتىنىن ايتقان.

ەردوعان بۇل جولى ءسۇريا تاقىرىبىندا فرانتسيا پرەزيدەنتىمەن ويىنىڭ ءبىر جەردەن شىققانىن اتاپ كورسەتتى. ياعني، ءسۇريا بولاشاعى ءۇشىن فرانتسياعا ۇقساس باشار اسادتىڭ بيلىكتەن كەتۋىن قالايتىنىن اشىق ايتقان. سونداي-اق، سۇرياداعى دايش كۇشتەرىمەن كۇرەسۋ ءۇشىن وزگە تەررورلىق توپتارمەن ىمىراعا كەلمەيتىنىن ايتىپ ۋادە بەرگەن.

فرانتسۋز جۋرناليستەرى تۇرىك باسشىسىن كوپتەگەن سۇراقتاردىڭ استىنان الدى. ءبىر جۋرناليست 2016 جىلعى 15 شىلدەدە بولعان توڭكەرىس تۋرالى ايتا كەلىپ، ۇكىمەتتىڭ ەل كولەمىندە توتەنشە جاعداي جاريالاپ وتىرعانىن، سونىڭ سالدارىنان قۋعىن-سۇرگىندەردىڭ ۇزاققا جالعاسقانى تۋرالى سۇراعاندا ەردوعان: «ءبىز ەلدەگى كەيبىر كۇشتەردىڭ بيلىككە قارسى كۇرەسىندە، ورنىقتىلىقتى ساقتاۋ ءۇشىن ەلدە توتەنشە جاعداي جاريالادىق. فرانتسيا دا تەررورلىق شابۋىل ءۇشىن دە توتەنشە جاعداي ۇزاق ۋاقىتقا جالعاستى ەمەس پە؟!» دەگەن جاۋابىن قايتاردى.

فرانتسيادا بولعان ءبىر كۇندىك ساپارى كەزىندە دە، ماكروننىڭ ۇكىمەتىن فەتحوللاح گۇلەن تاقىرىبىندا قولداۋ كورسەتۋىن، ەكى ەلدىڭ قالىپتى ديپلوماتيالىق قاتىناسى ءۇشىن گۇلەن تۋرالى ۇستانىمدارى تۇركيانىڭ قازىرگى ۇكىمەتىمەن بىردەي بولۋىن ۇسىنىس ەتتى. ەردوعاننىڭ بۇل ساپارىن، سول ەلدىڭ رەسمي اقپارات قۇرالدارى، سوڭعى كەزدەرى تۇركيانىڭ باتىس ەلدەرىمەن بولعان ارازدىعىنان كەيىن ەۋروپادا جاسالعان ماڭىزدى قادامدارىنىڭ ءبىرى دەپ باعالاپتى.

“The Qazaq Times”