تۇركيا مەن يراك پرەزيدەنتتەرى انكارادا كەزدەسەدى. فوتو: انادولى.

يراكتىڭ جاڭا پرەزيدەنتى تۇركياداعى العاشقى رەسمي ساپارىن باستادى. پرەزيدەنت بەرحام ساليح تۇركيا پرەزيدەنتى رەجەپ تايىپ ەردوعانمەن جەكەلەگەن كەزدەسۋ وتكىزدى. سونداي-اق، يراك-تۇركيا اراسىندا جوعارى دەڭگەيدەگى دەلەگاتسيالاردىڭ وتىرىسى ءوتتى.

تۇركيا باسشىسى ارىپتەسىن پرەزيدەنت سارايىندا قۇرمەت قاراۋىلى ارقىلى جوعارى دەڭگەيدە قارسى الۋ راسىمىمەن كۇتىپ الدى. كەزدەسۋدە تۇركيا بيلىگىنىڭ بىرقاتار جوعارى لاۋازىمدىلارى دا قاتىستى.

بەرحام ساليح العاشقى رەسمي ساپارلارىنىڭ ءبىرى رەتىندە انكاراعا ات باسىن بۇرۋىندا دا وزىندىك ءمانى بار. قازىر تۇركيا مەن يراك اراسىندا تەرروريزمگە قارسى ورتاق كۇرەس قىزۋ دەڭگەيدە. ەندى عانا ورنىعا باستاعان يراك ۇكىمەتى وڭىردەگى ماڭىزدى ويىنشى رەتىندە انكارا تارابىمەن بايلانىستى جاقسارتاتىنىن پرەزيدەنت ساليح بۇدان بۇرىنعى مالىمدەمەسىندە دە اتاپ وتكەن.

بىلتىر تامىز ايىندا تۇركيا قارۋلى كۇشتەرى جاعىنان باستالعان يراكتىڭ سولتۇستىك ايماقتارىندا تەررورلىق كۇشتەرگە سوققى بەرۋ وپەراتسيالارى ءالى دە جالعاسىپ جاتىر. تۇرىك اۋە كۇشتەرىنىڭ سوڭعى اۋە وپەراتسياسى بۇدان ەكى كۇن بۇرىن بولعان. وندا يراك سولتۇستىگىندەگى زاپ، مەتينا، اۆاشين-باسيان جانە گارا ايماقتارىنداعى PKK قارۋلى توپتارىنا تيەسىلى بەكىنىستەر تالقاندالعان.

“The Qazaq Times”