فوتو: Reuters

دۇنيەجۇزىلىك دەنساۋلىق ساقتاۋ ۇيىمىنىڭ ءوتىنىشى بويىنشا، ۇلىبريتانيانىڭ دارىگەرلەرى مەن مەدبيكەلەرىنەن جاساقتالعان توپ روحيندجا مۇسىلماندارىنا شۇعىل مەديتسينالىق كومەك كورسەتۋگە بارادى. قىرىق دارىگەردەن تۇراتىن العاشقى قۇرام  بانگلادەشتەگى كوكس بازار اۋماعىندا ورنالاسقان بوسقىندار لاگەرىنە اتتاندى. قازىر وندا ميانماداعى قاقتىعىستان كەيىن ءومىرىن ساقتاپ قالۋ ماقساتىندا بانگلادەشكە كەلگەن 600 مىڭ مۇسىلمان تۇرادى. بۇل تۋرالى ۆۆس اقپاراتتىق اگەنتتىگى جازدى. 

ۇلىبريتانيا دارىگەرلەرىنىڭ ديفتەريا دەرتىنە قارسى كۇرەسى 6 اپتاعا سوزىلادى. سوڭعى دەرەكتەر بويىنشا، ىندەتتىڭ كەسىرىنەن 27 ادام قازا تاۋىپ ۇلگەرگەن. ال كۇن سايىن اۋرۋعا شالدىققان 160 جاڭا ناۋقاس تىركەلەدى.

Medecins Sans Frontieres قايىرىمدىلىق ۇيىمىنىڭ حابارلاۋىنشا، ولاردىڭ جەرگىلىكتى اۋماقتا جۇمىس ىستەيتىن مەديتسينالىق كومەك ورتالىقتارىندا 2 مىڭعا جۋىق ادامدا ىندەت بەلگىلەرى بايقالعان. ولاردىڭ باسىم كوپشىلىگى - 5-14 جاس ارالىعىنداعى بالالار. اۋرۋدىڭ بەلەڭ الۋىنا سانيتارلىق تالاپتاردى ساقتاۋ مۇمكىندىگىنىڭ بولماۋى، ەكپە جۇرگىزىلمەۋى مەن بوسقىندار لاگەرىندەگى تازا اۋىز سۋ تاپشىلىعى سەبەپ بولىپ وتىر.

“The Qazaq Times”