جاڭا «ءتاج ءتارىزدى ۆيرۋس» العاش تىركەلگەن قىتايدىڭ ۋحان قالاسىندا ىندەت قايتا تارادى. ىندەتكە شالدىققان بىرنەشە ناۋقاس بايقالعاننان كەيىن ۋحاندىقتار قايتا تەستتەن وتكىزىلىپ جاتىر. بۇل تۋرالى قىتايدىڭ جەرگىلىكتى اقپارات قۇرالدارى مالىمەت تاراتتى.

العاشقى مالىمەتتەرگە سايكەس، ىندەت قالانىڭ 7 تۇرعىنىنان بايقالعان. بۇل ۋحاندا ءبىر جىلدان استام ۋاقىتتان بەرى العاش رەت تىركەلگەن جاعدايى. قىتاي پاندەميانى ەڭ ءونىمدى تەجەگەن ەل رەتىندە اتالعانىمەن، سوڭعى كۇندەرى ىندەت جۇقتىرعانداردىڭ تىركەلۋى جيىلەدى. ەلدىڭ 15 پروۆينتسياسىندا ىندەت قايتا تاراي باستادى.  10 كۇن ىشىندە 300-دەن اسا كەيس تىركەلگەن.

قىتاي رەسميلەرى ىندەتتىڭ قايتا جاندانۋىن اسا جۇعىمتال «دەلتا» ۆيرۋسى جانە ىشكى تۋريزم سەزونىمەن بايلانىستىرادى. سەيسەنبى كۇنى 90 جاڭا جاعداي تىركەلگەننەن كەيىن ۋحان قالاسىنىڭ تۇرعىندارىنا قۇلاقتاندىرۋ جاريالاندى. ۆيرۋستىڭ جاڭا شتامى قىتاي ورتالىعى بەيجىڭنەن دە انىقتالدى.

“The Qazaq Times”