قازاقستان مەن موڭعوليا ەكى ەلدى بايلانىستىراتىن تاس جول قۇرىلىسىن باستاۋعا بايلانىستى كەلىسسوزدەر جۇرگىزۋدە – دەپ مالىمدەدى سىرتقى ىستەر ءمينيسترى قايرات ءابدىراحمانوۆ.

قايرات ءابدىراحمانوۆ ماجىلىستە سويلەگەن سوزىندە: «قازاقستاننىڭ سىرتقى ساياساتىندا موڭعوليانىڭ الاتىن ورنى ەرەكشە. سەبەبى بايان-ولگەي ايماعىندا قازاق دياسپوراسىنىڭ سانى باسىم. ەكى جاقتىق قارىم-قاتىناس ورناتۋدا ءبىرىنشى كەزەكتە كۇن تارتىبىندە تۇرعان ماسەلە بايان-ولگەي ايماعىندا قازاقستان كونسۋلدىعىن اشۋ جانە قىتاي مەن رەسەي ارقىلى وتەتىن تاس جول قۇرىلىسىن باستاۋ» - دەگەن.

قازىرگى تاڭدا بايان-ولگەي ايماعىندا 91 مىڭ 470 ادام تۇرادى. ونىڭ 93 پايىزىن قازاقتار قۇرايدى. ايماقتا 43 ورتا مەكتەپ بار. ولاردىڭ 38-ءى قازاق تىلىندە ءبىلىم بەرەدى. ولگەي قالاسىندا سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ فيليالى قىزمەت ىستەۋدە.

ايماق بويىنشا، قازاقستان ۇكىمەتىنىڭ قولاۋىمەن «قازاقستان»، «حابار»، «كتك»، «31-ارنا»، «استانا»، «بالاپان»، «جەتىسۋ»، «Kazsport» تەلەارنالارى كورسەتىلەدى. بۇدان بولەك قازاق تىلىندە «جاڭا ءداۋىر»، «موڭعول زامان»، «ءبىلىم» گازەتتەرى اپتاسىنا 3-4 مىڭ دانامەن شىعادى. ينتەرنەت باسىلىمداردان قازاق تىلىندە "KAZNEWS" جانە "BAIOLKE" پورتالدارى جۇمىس ىستەۋدە.

“The Qazaq Times”