رەسەي قۇرلىقارالىق بالليستيكالىق زىمىرانىن سىناقتان وتكىزدى

رەسەي بالليستيكالىق زىمىرانىن سىناقتان وتكىزدى – دەپ حابارلايدى رەسەيلىك ينتەرفاكس اقپارات اگەنتتىگى.

رەسەي فەدەراتسياسىنىڭ قورعانىس مينيسترلىگى تاراتقان مالىمەت بويىنشا، 26 جەلتوقسان كۇنى توپول بالليستيكالىق زىمىرانى سىناقتان وتكىزىلگەن. زىمىران استراحان وبلىسىنداعى كاپۋستين يار سىناق الاڭىنان ۇشىرىلعان. توپول بالليستيكالىق زىمىرانىن سىناقتان وتكىزۋدىڭ باستى ماقساتى قۇرلىقارالىق زىمىرانداردىڭ ۇشۋ قاشىقتىعى مەن قوسالقى جابدىقتارىن تەكسەرۋ بولعان.

بۇعان دەيىن جەرگىلىكتى باق وكىلدەرى قازان ايىنىڭ 26-سى كۇنى رەسەي قارۋلى كۇشتەرىنىڭ ءبىر كۇندە ءتورت بىردەي قۇرلىقارالىق بالليستيكالىق زىمىراندى سىناقتان وتكىزگەنىن جارىسا جازعان بولاتىن. ولاردىڭ ۇشەۋى اتوم سۇڭگۋىر قايىقتارىنان، بىرەۋى پلەسەتسك سىناق الاڭىنان ۇشىرىلعان.  ال بۇنىڭ الدىندا قىركۇيەك ايىنىڭ 18-ءى كۇنى ۇشىرىلعان ەسكەندىر-م زىمىرانى قازاقستان اۋماعىنداعى ماقات پوليگونىنا كەلىپ قۇلاعان.

“The Qazaq Times”