فوتو: Luchshiye

امەريكالىق بانك بۇعات قويعان ۇلتتىق قوردىڭ قارجىسى قازاقستاننىڭ جەكە مەنشىگى بولىپ قالا بەرەدى. بۇل تۋرالى ادىلەت ءمينيسترى مارات بەكەتاەۆ مالىمدەدى. الايدا الداعى ۋاقىتتا بۇل اكتيۆتەردى ساتۋ نەمەسە وتكىزۋ جۇزەگە اسىرىلمايدى.  

ءمينيستردىڭ سوزىنشە، ۇلتتىق قوردى باسقارۋشى ۇلتتىق بانك قاجەتتى ساياساتتى جۇرگىزەدى.

"ەشكىم 22 ميللياردتى الا المايدى. بىراق ءبىز ءتىپتى داۋلى سومانى بەرگىمىز كەلمەيدى، ويتكەنى اربيتراجدىق شەشىم الاياقتىق جولمەن الىنعان دەپ ەسەپتەيمىز. وسى جىلدىڭ باسىندا بارلىق قۇجاتتار مەن دالەلدەردى اعىلشىن سوتىنا بەردىك. اعىلشىن سوتى ءبىزدى قولداپ، الاياقتىق فاكتىلەرى بار ەكەنىن ايتىپ، لوندون سوتىندا قاراۋ كەرەكتىگى تۋرالى بۇيرىق بەردى. تىڭداۋلار 2018 جىلدىڭ قازان ايىنا بەلگىلەندى", - دەدى بەكەتاەۆ ۇكىمەت وتىرىسىنىڭ كلۋارىندا.

وسى ماسەلەگە قاتىستى ۇلتتىق بانك توراعاسى دا جاۋاپ بەردى. ونىڭ سوزىنشە، ۇلتتىق قوردى باسقارۋشى قارجى ينستيتۋتى بۇل قارجىنى سىرتقى باسقارۋشى ۇيىمدارعا ورنالاستىرادى. باسقارۋدىڭ قۇرىلىمىن تۇسىندىرگەن ول،  قارجى بىرنەشە كاستوديان بانكتەردە ورنالاستىرىلاتىنىن ايتادى.

"كاستوديان بانك - بۇل ۇلتتىق قور سالعان بارلىق قارجى قۇرالدارىن ەسەپكە الۋ جانە ساقتاۋ بويىنشا ارنايى فۋنكتسيالاردى ورىندايتىن بانك، سونداي-اق سول بويىنشا ەسەپ جۇرگىزەدى. ياعني بۇل دەگەنىمىز بىرنەشە كاستوديان بولۋى مۇمكىن، تيىسىنشە ۇلتتىق قور بويىنشا دا بىرنەشەۋى بولادى. ال بەلگياداعى كاستوديان بانك - The Bank of New York Mellon. قازىرگى ۋاقىتتا وندا شاعىمعا بايلانىستى بۇعاتتالعان 22 ميلليارد اقش دوللارى جاتىر. وكىنىشكە وراي،  شاعىم سوماسى بۇعاتتالعان قارجى سوماسىمەن سايكەس كەلمەيدى. ءبىزدىڭ ۇكىمەت پەن زاڭ كەڭەسشىلەرى بىرنەشە رەت ايتقان. نەگىزىنەن تاجىريبە تۇسىنىكتى، ءبىز زاڭ بويىنشا بۇل شەشىمگە نارازىلىق بىلدىردىك", - دەدى دانيار اقىشەۆ.

ايتا كەتەيىك، 21 جەلتوقساندا امەريكالىق Bank of New York Mellon سوت ىسىنە بايلانىستى قازاقستان ۇلتتىق قورىنىڭ 22 ملرد دوللارىنا بۇعات قويعانى تۋرالى اقپارات تاراعان. ۇلتتىق قور قارجىسىنىڭ بۇعاتتالۋىنا مولدوۆالىق بيزنەسمەن اناتولي ءستاتيدىڭ ارىزى سەبەپ بولعانقازىرگى ۋاقىتتا قازاقستاننىڭ ۇلتتىق بانكى  BNY Mellon-عا قارسى شاعىم تۇسىرگەن.

“The Qazaq Times”