اقش وزبەكستاننىڭ بۇرىنعى پرەزيدەنتى يسلام كارىموۆتىڭ قىزى گۇلنارا كارىموۆاعا قارسى سانكتسيا جاريالادى – دەپ حابارلايدى Reuters اقپارات اگەنتتىگى.

اقش قارجى مينيسترلىگىنىڭ حابارلاۋىنشا، گۇلنارا كارىموۆانىڭ ۇستىنەن قوزعالعان قىلمىستىق ىستەرگە بايلانىستى «ماگنيتسك زاڭى» بويىنشا، وعان قارسى سانكتسيا جاريالانعان. اقش بيلىگى گۇلنارا كارىموۆانىڭ ۇستىنەن قىلمىستىق ءىستى 2013 جىلدان باستاپ جۇرگىزىپ كەلەدى. تەكسەرۋ جۇمىستارى بارىسىندا گۇلنارا كارىموۆا اكەسى يسلام كارىموۆ وزبەكستاندى باسقارىپ تۇرعان جىلدارى شەتەلدىك كومپانيالاردان 1 ميلليارد دوللار كولەمىندە پارا العان. ول اتالمىش قارجىنى تازارتۋ ماقساتىندا شۆەيتساريا، گونكونگ، ءباا سىندى مەملەكەتتەردەن قارجى اكتيۆتەرىن ساتىپ العان.

تامىز ايىندا وزبەكستان باس پروكۋراتۋراسى رەسەي بيلىگىنەن ەل اۋماعىنداعى گۇلنارا كارىموۆاعا تيەسىلى بىرنەشە جىلجىمايتىن مۇلىكتى بۇعاتتاۋدى سۇراعان بولاتىن. وزبەكستان بيلىگىنىڭ مالىمەتىنشە، گۇلنارا كارىموۆانىڭ رەسەي استاناسى ماسكەۋدە سەگىز پاتەرى، رۋبلەۆكا اۋدانىندا كوتەدجى جانە «كامەلوت» تۇرعىن ءۇي كومپلەكسىندە پەنتحاۋسى بار.

ەستەرىڭىزگە سالايىق، وزبەكستان بيلىگى 2013 جىلى گۇلنارا كارىموۆاعا «اسا ءىرى كولەمدە قارجى جىمقىردى جانە سالىق تولەۋدەن جالتاردى» دەگەن ايىپ تاعىپ، ونىڭ ۇستىنەن قىلمىستىق ءىس قوزعاعان بولاتىن. كەيىننەن 2015 جىلى تاشكەنت قالالىق سوتى گۇلنارا كارىموۆانى 5 جىلعا سوتتاپ، دۇنيە-مۇلكىن تاركىلەگەن. بىراق گۇلنارا كارىموۆاعا تاعىلعان ايىپتارمەن ونىڭ ۇلى يسلام كارىموۆ مۇلدە كەلىسپەيتىندىگىن مالىمدەگەن. ونىڭ سوزىنشە، اناسىنىڭ ۇستىنەن قىلمىستىق ءىس قوزعالىپ، 5 جىلعا سوتتالۋىنىڭ ساياسي استارى بار.

“The Qazaq Times”