فوتو: QT

بۇگىن الماتى قالاسىنىڭ اكىمدىگى، شاھار تۇرعىندارى مەن قوناقتارى، ساياسي ۇيىمدار مەن پارتيا مۇشەلەرى تاۋەلسىزدىك مونۋمەنتىنە گۇل شوقتارىن قويدى.

قالا اكىمى باۋىرجان بايبەكتىڭ قاتىسۋىمەن بولعان رەسمي شارادا اسكەري وركەستر ءانۇران وينادى. بىراق بيلىك وكىلدەرىنەن ەشكىم قۇتتىقتاۋ ءسوزىن سويلەگەن جوق. جينالعان قاۋىم رەسمي وكىلدەر الاڭنان كەتكەننەن كەيىن، جىلداعى ءداستۇر بويىنشا، 1986 جىلى بولعان جەلتوقسان وقيعاسىنىڭ قۇرباندارىنا قۇران باعىشتادى.

فوتو: QT

1986 جىلى بولعان جەلتوقسان وقيعاسىندا قانشا ادام قۇربان بولعانى ءالى كۇنگە دەيىن بەلگىسىز. قازاقستان تاۋەلسىز ەل اتانسا دا وسى ۋاقىتقا دەيىن جەلتوقسان وقيعاسىنا ءوز دەڭگەيىندە ساياسي باعا بەرىلگەن جوق.

2011 جىلدان بەرى قازاقستاندىقتار 16 جەلتوقسان كۇنى جەلتوقسان قۇرباندارى مەن قاتار جاڭاوزەن قالاسىنداعى قاندى وقيعانى قاتار ەسكە الادى. سەبەبى ءدال وسى كۇنى 2011 جىلى ماڭعىزتاۋ وبلىسىنا قاراستى جاڭاوزەن قالاسىندا بيلىك قازاق حالقىنا قارسى وق اتقان بولاتىن. رەسمي دەرەكتەر بويىنشا، جاڭاوزەن وقيعاسىندا 16 ادام كوز جۇمىپ، 100-گە جۋىق ادام جاراقات العان.

“The Qazaq Times”