ستامبۋلداعى سامميتە جينالعان يسلام ەلدەرى باسشىلارى. فوتو: TRT,

يسلام ىنتىماقتاستىق ۇيىمىنا كەزەكتى توراعا ەل رەتىندە تۇركيا ستامبۋل قالاسىندا ۇيىمعا مۇشە ەلدەردى كەزەكتەن تىس وتىرىسىنا شاقىردى. تۇركيانىڭ «تۇرىك تەلە-راديو» قىزمەتىنىڭ سايتى حابارلاعان مالىمەتكە سۇيەنسەك، ءسامميتتىڭ قورىتىندىسى رەتىندە دەكلاراتسيا قابىلدانىپ، وندا شىعىس يەرۋساليمدى پالەستينا استاناسى دەپ جاريالاعان.

اتالعان دەكلاراتسيا نەگىزىندە الەمدىك قاۋىمداستىقتى دا يەرۋساليمدى باسقىنشىلىق استىنداعى پالەستينانىڭ استاناسى دەپ مويىنداۋعا شاقىرماق. بۇل باستامانى تۇركيا پرەزيدەنتى رەجەپ تايىپ ەردوعان باس بولىپ كوتەرگەن. ۇيىمعا مۇشە يسلام ەلدەرى يەرۋساليمگە قاتىستى قارارلاردى بەكىتىپ، حالىقارالىق قاۋىمداستىقتىڭ وسى شەشىمگە وڭ جاۋابىن بەرۋىن سۇراعان.

پالەستينا پرەزيدەنتى ماحمۇد ابباس باستاپ، اقش-تى يزرايل مەن پالەستينا اراسىنداعى بەيبىتشىلىك پروتسەسىنە بىتىمگەرشىلىك رولىنەن ماقۇرىم ەتۋ تۋرالى دا شەشىم قابىلداعان.

دەگەنمەن، باتىس ەلدەرىنىڭ اقپارات قۇرالدارى جاريالاعان مالىمەتتەرگە قاراعاندا ۇيىمعا مۇشە كەيبىر ەلدەر اقش شەشىمىنە قارسى ەمەس. يسلام ىنتىماقتاستىق ۇيىمنىڭ كەزەكتەن تىس وتىرىسىندا قابىلدانعان قارارلار مەن اقش شەشىمى مۇلدە قاراما-قايشىلىققا ۇلاستى. بۇل ءوڭىردىڭ بەيبىتشىلىك پروتسەسىنە اۋىر قيىنشىلىقتاردى الىپ كەلدى.

ناتيجەلەرىنە قاراعاندا يسلام ىنتىماقتاستىق ۇيىمىنىڭ كەزەكتەن تىس وتىرىسى ءوڭىر قاۋىپسىزدىگىنىڭ مۇددەسىنە ساي شەشىم قابىلداي الماعانى بايقالادى. سەبەبى، داۋلى يەرۋساليم قالاسىن پالەستينا استاناسى دەپ مويىنداۋ، تەك اقش پەن يزرايل شەشىمىن كەرى جاعىنان قايتالاعانمەن بىردەي. وسىنىڭ ءوزى يزرايل-پالەستينا اراسىنداعى داۋدى ورشىتپەسە، بەيبىتشىلىك قادامدارىنا كومەكتەسۋى ەكىتالاي.

“The Qazaq Times”