فوتو: CBS

نيۋ-يورك قالاسىندا بولعان سوڭعى تەررورلىق اكتىگە قاتىسى بار دەگەن ايىپپەن تۇتقىندالعان كۇدىكتى، 27 جاستاعى بانگلادەشتەن كەلگەن يمميگرانت الەۋمەتتىك جەلىدە دونالد ترامپقا ەسكەرتۋ جاساعانى انىقتالدى. قاۋىپسىزدىك قىزمەتكەرلەرى تاپقان جازبادا كۇدىكتى اقش پرەزيدەنتىنە "سەن ءوز ۇلتىڭدى قورعاۋ مىندەتىن ورىنداي المادىڭ!" دەپ جازعان. بۇل تۋرالى ۆۆس اقپاراتتىق اگەنتتىگى جازدى. 

اكايەد ۋللا (Akayed Ullah) مانحەتتەن پورتىنداعى اۆتوبۋس بەكەتىندە دەنەسىنە بايلانعان قۇرىلعى ارقىلى جارىلىس ۇيىمداستىردى دەگەن كۇدىكپەن جاۋاپقا تارتىلىپ وتىر. وقيعا سالدارىنان اكايەد ۋللا مەن تاعى ءۇش ادام جارالانعان.

نيۋ-يورك پوليتسيا دەپارتامەنتى ءوزىنىڭ تۆيتتەر پاراقشاسىندا جانكەشتىگە قارۋدى قىلمىستىق ماقساتتا يەلەنگەنى، تەررورلىق قاۋىپ توندىرگەنى ءۇشىن كىنا ارتىلىپ وتىرعانىن جازدى. سەيسەنبى كۇنى كەشكىسىن ولاردىڭ قاتارى قوعامدىق ورىندا جارىلىس ۇيىمداستىرۋ، جاپپاي قىرىپ-جويۋ قارۋىن قولدانۋ، شەتەلدىك تەررورلىق ۇيىمنىڭ ماتەريالدى قولداۋىن پايدالانۋ سياقتى فەدەرالدى ايىپتاۋلارمەن تولىقتى.

قاۋىپسىزدىك قىزمەتكەرلەرىنىڭ مالىمەتىنشە، اكايەد ۋللا (Akayed Ullah) قولعا تۇسكەن كەزىندە "مەن مۇنى "يسلام مەملەكەتى" ءۇشىن جاسادىم" دەپ مالىمدەگەن. ونىڭ بۇل ارەكەتىنە اقش اۋە كۇشتەرىنىڭ "يسلام مەملەكەتى" لاڭكەستىك ۇيىمىنا جاساعان سوققىلارى تۇرتكى بولعان.

كۇدىكتىنىڭ پوليتسيامەن اڭگىمەسىنەن ونىڭ جارىلعىش زاتتى قولدان جاساۋدى وسىدان ءبىر جىل بۇرىن ۇيرەنىپ، تەررورلىق اكتىنى بىرنەشە اپتا بويى جوسپارلاعانى بەلگىلى بولدى. ونىڭ ۇيىنەن جارىلعىش زات قۇراستىرىلعان روجدەستۆوعا ارنالعان جارىقتار مەن مەتالل بولشەكتەرى تابىلدى. اكايەد ۋللا (Akayed Ullah) جارىلىس قۇرباندارىنىڭ سانىن ارتتىرۋ ءۇشىن ادام اياعى كوپ جۇرەتىن ۋاقىت پەن ورىندى ادەيى تاڭداعانىن ايتتى.

بانگلادەش بيلىگى ءوز ازاماتىنىڭ بۇرىن-سوڭدى قىلمىستىق جاۋاپكەرشىلىككە تارتىلماعانىن حابارلادى. ونىڭ اعاسى Assosiated Press اگەنتتىگىنە بەرگەن سۇحباتىندا، اكايەد ۋللا وسى جىلدىڭ قىركۇيەگىندە بانگلادەشتە 6 اپتاعا جۋىق ۋاقىت بولعانىن ايتقان. قازىر ونىڭ راديكالدى كوزقاراستاردىڭ ىقپالىنا  قالاي تۇسكەنىن انىقتاۋ ءۇشىن، ونىڭ بانگلادەشتە قالعان ايەلى مەن جاقىن تۋىستارىنان جاۋاپ الىنىپ جاتىر.

“The Qazaq Times”