ءسۇريادان اۋعانستانعا قاشىپ بارعان «يسلام مەملەكەتى» لاڭكەستىك ۇيىمى وزبەكستان مەن تۇركىمەنستان شەكاراسىنا جاقىن اۋدانداردا جاڭا اسكەري وقۋ-جاتتىعۋ لاگەرلەرىن قۇرۋدا - دەپ حابارلايدى AFP اقپارات اگەنتتىگى.

اۋعانستاننىڭ وزبەكستان جانە تۇركىمەنستانمەن شەكتەسەتىن دارزاب اۋدانىنىڭ باسشىسى بااز مۇحامماد دوۆاردىڭ سوزىنشە، ءسۇريادان قاشقان «يسلام مەملەكەتى» تەررورلىق ۇيىمىنىڭ ورتالىق ازيا، شەشەنستان، اراب ەلدەرى، فرانتسيا جانە سولتۇستىك افريكادان شىققان مۇشەلەرى اۋعانستاننىڭ سولتۇستىك اۋداندارىندا توپتاسىپ، جاڭا اسكەري وقۋ-جاتتىعۋ لاگەرلەرىن قۇرۋدا. دارزاب اۋدانىنا قاراسىتى دارزابا اۋلىنىڭ تۇرعىندارى اۋدان بيلىگىنە اۋىلدان 100 مەتر جەردە بەلگىسىز 200-گە جۋىق ادامنىڭ لاگەر قۇرىپ جاتقاندىعىن ايتقان. كەيىننەن ولاردىڭ باسىم كوپشىلىگى وزبەكستان مەن شەشەنستان ازاماتتارى ەكەندىگى انىقتالعان. بىراق ءبىر قىزىعى ەل بيلىگى ءالى كۇش الا قويماعان از عانا تەرروريستەر توبىنا قارسى ەشقانداي كۇش قولدانباعان.

بۇعان دەيىن پەنتاگون «اۋعانستان اۋماعىندا «يسلام مەملەكەتى» لاڭكەستىك ۇيىمىنىڭ 1000-نان استام سودىرى بار. بىراق ولاردىڭ سانى كۇن وتكەن سايىن سىرتتان كەلىپ جاتقان ادامدارمەن تولىعۋدا. بۇل اتالمىش ۇيىمنىڭ سولتۇستىك اۋعانستاندا جاڭا حاليفات قۇرۋعا تالپىنىس جاساۋىنىڭ باسى بولۋى مۇمكىن» - دەگەن اقپارات تاراتىپ، اۋعانستان اۋماعىنداعى اسكەر سانىن كوبەيتكەن. ال جەلتوقسان ايىنىڭ 11-ءى كۇنى رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆ: «ورتالىق ازيا ەلدەرى اۋعانستان ماسەلەسىن شەشۋگە اتسالىسۋى ءتيىس» دەپ مالىمدەگەن.

“The Qazaq Times”