ترامپ يمميگراتسيانى شەكتەۋ ساياساتىن جولعا قويعىسى كەلەدى. فوتو: Deadline.

اقش پرەزيدەنتى دونالد ترامپ، دۇيسەنبى كۇنى نيۋ-يوركتەگى تەررورلىق شابۋىلدان كەيىن، اقش-تىڭ يمميگراتسيا جۇيەسىنە مۇقيات رەفورما جاساۋ قاجەتتىگىن، وتباسىلىق قاتىناستاردى نەگىزگە الا وتىرىپ يمميگراتسيا ساياساتىن جۇزەگە اسىرۋ كەرەكتىگىن العا تارتتى. بۇل تۋرالى «WSJ» باسىلىمى حابارلادى.

ترامپتىڭ مالىمدەۋىنشە، دۇيسەنبى كۇنى بولعان تەررورلىق شابۋىلدى ۇيىمداستىرۋشىلار اقش-قا يمميگراتسيالىق جولمەن كىرىپ، ەلدىڭ ۇلتتىق قاۋىپسىزدىگىنە قارسى ارەكەت ەتكەن. كۇدىكتى اقاياد ۋوللاح 2011 جىلى بانگلادەشتەن امەريكا قۇراما شتاتتارىنا قونىس اۋدارعان. ول اقش ازاماتىنىڭ جاقىن تۋىسقانى رەتىندە ۆيزا العان، ءارى زاڭدى تۇراقتى رەزيدەنت بولىپ سانالادى.

سوڭعى اپتالاردا «تىزبەكتى كوشىپ كەلۋ» ماسەلەسى رەسپۋبليكاشىلدار پارتياسى ءۇشىن ەڭ باستى تالقى تاقىرىبىنا اينالدى. كوپتەگەن رەسپۋبليكالىق پارتيانىڭ زاڭ شىعارۋشى وكىلدەرى وسى ماقساتقا قول جەتكىزۋدى «Dreamer» دەپ اتالاتىن زاڭداستىرۋمەن جۇزەگە اسىرۋعا بولادى دەپ قارايدى. «Dreamer» دەگەن اتاۋ اقش-قا بالا كۇنىندە كەلگەن جانە سودان بەرى زاڭسىز تۇرىپ كەلە جاتقان ادامدارعا قاراتىلعان.

ترامپتىڭ ايتۋىنشا ونىڭ ءۇشىنشى رەتكى ساياحاتقا ءتيىم ساۋل ەرەجەلەرى قاۋىپسىزدىكتى قامتاماسىز ەتۋگە كوپ جەڭىلدىكتەر الىپ كەلەدى. ەستەرىڭىزدە بولسا بۇل تيىم سالۋ ەرەجەسىنە التى مۇسىلمان ەلى مەن سولتۇستىك كورەيا جانە ۆەنەسۋەلانىڭ كەيبىر رەسمي تۇلعالارى كىرگەن ەدى. ترامپ كونگرەستىڭ وتباسىلىق قارىم-قاتىناس ارقىلى اقش-قا كەلۋشىلەردى شەكتەيتىن زاڭ جوباسىن ماقۇلداۋىن تالاپ ەتۋدە. بۇل ساياحاتقا تيىم سالۋ ەرەجەسىندە بانگلادەش قامتىلماعان.

اقش ىشكى قاۋىپسىزدىك دەپارتامەنتىنىڭ حاتشىسى كيرستەن نيلسەن مالىمدەمەسىندە، ترامپ ۇكىمەتى قۇراما شتاتتاعى كەز-كەلگەن تەرروريستىك كۇشتەرگە قارسى كۇرەس جۇرگىزبەك. ول جانە ىشكى قاۋىپسىزدىك دەپارتامەنتى نيۋ-يوركتەگى تەررورلىق شابۋىلدى تەكسەرۋگە ارالاساتىن بولادى.

“The Qazaq Times”