الماتى قالاسىندا "تۇركىتىلدەس جۋرناليستەر قورى" قوعامدىق قورى جانە "حالىق بانك" اق مەن "قازكوممەرتسبانك" اق دەمەۋشىلىگىمەن وتكەن جۋرناليستەر اراسىنداعى "ەركىن ءسوز" شىعارماشىلىق بايقاۋى اياقتالدى.

9 جەلتوقسان كۇنى قورىتىندىلانعان شىعارماشىلىق بايقاۋعا گازەت، تەلەارنا، سايت جانە راديو جۋرناليستەرى  قارجى تاقىرىبىنا جازىلعان ماتەريالدارىن جولداپ، وزدەرىنىڭ باعىن سىنادى. بايقاۋ قورىتىندىسى بويىنشا "ۇزدىك تەلەسيۋجەت" نوميناتسياسىن "استانا" تەلەارناسىنىڭ ءجۋرناليسى ەركىن قارين، "ۇزدىك ماقالا" نوميناتسياسىن "ايقىن" گازەتىنىڭ ءجۋرناليسى اباي ايماعامبەت، "ۇزدىك سايت ماقالاسى" اتالىمىن "تۇرانينفورم" سايتىنىڭ ءجۋرناليسى قۇرمانعالي نۇرعاليەۆ،  "ۇزدىك شىعارماشىلىق توپ" نوميناتسياسىن "قازاقستان" ۇلتتىق تەلەارناسىنداعى "پاراسات مايدانى" باعدارلاماسىنىڭ شىعارماشىلىق توبى جەڭىپ الدى.

"ۇزدىك سايت ماقالاسى" اتالىمىن جەڭىپ العان "تۇرانينفورم" سايتىنىڭ ءجۋرناليسى قۇرمانعالي نۇرعاليەۆ جانە "زاڭ" گازەتى باس رەداكتورىنىڭ ورىنباسارى اينۇر سەمباەۆا. فوتو: ماقسات قۇسايىنوۆ.

ماراپاتتاۋ كەشىندە  يۋنەسكو ۇيىمىنىڭ قازاقستانداعى وكىلى سەرگەي كارپوۆ، بۇۇ-نىڭ تۇراقتى وكىلى ۆلاستيميل سامەك، "جاس وركەن" جشس-نىڭ باس ديرەكتورى جۇسىپبەك قورعاسبەك، "حالىق بانك" اق PR مەنەدجەرى دوسبول ارىستانبەكوۆ پەن "قازكوممەرتسبانك" اق PR مەنەدجەرى مەرۋەرت بەردىباەۆا جانە "زاڭ" گازەتى باس رەداكتورىنىڭ ورىنباسارى اينۇر سەمباەۆا جەڭىمپاز جۋرناليستەرگە جۇلدە تاپسىردى.

بايقاۋعا ادىلقازى بولعان ساياساتكەر-جۋرناليست ءامىرجان قوسانوۆ جەڭىمپازداردى ماراپاتتاۋ كەزىندە "ەركىن ءسوز" بايقاۋىنا قازاق جۋرناليستەرى كەلەسى جىلى بۇدان دا  بەلسەندىرەك قاتىسسا ەكەن دەگەن تىلەگىن ءبىلدىردى.

"ىسكەر مەديا" رەداكتورى ءاسيا اقىشەۆا مەن ساياساتكەر-جۋرناليست ءامىرجان قوسانوۆ. فوتو: ماقسات قۇسايىنوۆ.

سونداي-اق، بايقاۋعا قازىلىق ەتكەن "ىسكەر مەديا" رەداكتورى اسيا اقىشەۆا قارجى سالاسىن جازۋدا تەلارنا جۋرناليستەرىنىڭ وزىق ەكەنىن، بايقاۋعا قاتىسۋشىلار اراسىندا بەلسەندى بولعانىن جانە سايت جۋرناليستەرىنە قويار تالابىن دا اتاپ ءوتتى.

"سايت جۋرناليستەرىنە ايتارىم، وزدەرىڭىز جازىپ وتىرعان ارگۋمەنتتىڭ جۇيەلى بولۋىنا ءمان بەرسەڭىزدەر. قازىرگى جۋرناليستيكا سالاسىندا قولدانىلىپ جۇرگەن مۋلتيمەديالىق ونىمدەردى، ينفوگرافيكانى قولدانا بىلسەڭىزدەر نۇر ۇستىنە نۇر بولار ەدى", - دەدى ءاسيا اقىشەۆا.

"تۇركىتىلدەس جۋرناليستەر قورى" قوعامدىق قورىنىڭ پرەزيدەنتى ءنازيا جويامەرگەن. فوتو: ماقسات قۇسايىنوۆ.

ال وسى بايقاۋدى ۇيىمداستىرىپ، باسى-قاسىندا جۇرگەن "تۇركىتىلدەس جۋرناليستەر قورى" قوعامدىق قورىنىڭ پرەزيدەنتى ءنازيا جويامەرگەن بۇل بايقاۋعا دايىندىق جۇمىستارى وسىدان 7 اي بۇرىن باستالعانىن جانە الداعى ۋاقىتتا دا ۇيىمداستىرىلا بەرەتىنىن اتاپ ءوتتى.

ايتا كەتەيىك، "ەركىن ءسوز" شىعارماشىلىق بايقاۋى قازان ايىندا باستالعان. بايقاۋدىڭ ماقساتى - قازاق جۋرناليستەرىنىڭ كاسىبي بىلىكتىلىگىن كوتەرۋ جانە جاس جۋرناليستەردى ىنتالاندىرۋ.

“The Qazaq Times”