اۋىل اكىمدەرىن سايلاۋ كەزىندە جۋرناليست قۋىلعان جامبىل وبلىسىنىڭ شۋ اۋدانى ءوندىرىس اۋىلدىق وكرۋگىنىڭ ورتالىعى اباي اۋىلىنداعى №436 سايلاۋ ۋچاسكەسى. 25 شىلدە 2021 جىل. فوتو: QT / ميات كاشىباي

جامبىل وبلىسىنداعى اۋىلداردىڭ بىرىندە سايلاۋ ۋچاسكەدەن اقپارات تاراتقان The Qazaq Times ءتىلشىسى كەشكى ساعات 17:00-گە قاراي ۋچاسكەدەن ءماجبۇرلى تۇردە شىعارىلدى. ونى ۋچاسكەدەن شىعارۋ تۋرالى اكت تولتىرعان كوميسسيا توراعاسى تورەحان ازاماتوۆ جۋرناليستە پتر-تەستەنىڭ تەرىس قورىتىندىسىن راستايتىن قۇجاتى جوق دەگەن ءۋاج كەلتىرگەن.

رەداكتسيا ءتىلشىسى 25 شىلدەدە تاڭەرتەڭگى ساعات 8:20 شاماسىندا شۋ اۋدانى ءوندىرىس اۋىلدىق وكرۋگىنىڭ ورتالىعى اباي اۋىلىنداعى №436 سايلاۋ ۋچاسكەسىن باقىلاپ،  اقپارات تاراتۋ ءۇشىن بارعان. باستاپقىدا ۋچاسكەلىك سايلاۋ كوميسسياسى ءتىلشىنىڭ باق وكىلى رەتىندە قۇجاتتارىن تىركەپ، سايلاۋ پروتسەسىن باقىلاۋعا رۇقسات بەرگەن. ساعات 9:30 شاماسىندا ءتىلشى Facebook جەلىسىندەگى جەكە پاراقشاسىندا سايلاۋ  ۋچاسكەسىندەگى جاعدايدان حابار تاراتا باستاعاننان كەيىن كوميسسيا توراعاسى وعان شۇيلىگە باستاعان.

ازاماتوۆ الدىمەن تىلشىدەن رەداكتسيالىق تاپسىرماسى بار-جوعىن سۇراعان. ءتىلشى سۇراعان قۇجاتتى ۇسىنعان.

ال ساعات تۇسكى 13.00 شاماسىندا كوميسسيا توراعاسى جۋرناليستەن پتر-تەست سۇراعان. جۋرناليست پتر-تەست جاساتپاعانىن ايتقان سوڭ كوميسسيا ونى شىعارۋعا وقتالعان. ءتىلشىنىڭ «پتر-تەست نە سەبەپتى تۇستەن كەيىن تالاپ ەتىلدى؟» دەگەن سۇراعىنا كوميسسيا توراعاسى «ەندى ەسىمە ءتۇستى» دەگەن جاۋاپ ايتتى.

وسىلايشا،  ساعات كەشكى 17:00-گە قاراي The Qazaq Times ءتىلشىسىن بىرنەشە پوليتسيا قىزمەتكەرى ۋچاسكەدەن كۇشتەپ شىعاردى. وسىدان سوڭ ءتىلشى سايلاۋ پروتسەسىنىڭ قالعان بولىگىن ۋچاسكەنىڭ  سىرتىنان باقىلادى. ءتىلشىنىڭ ەسەبى بويىنشا، كەشكى 20.00-گە دەيىن تىركەلگەن 891 سايلاۋشىنىڭ 381-ءى (42 %) داۋىس بەرۋگە قاتىسقان. الايدا سايلاۋدىڭ قورىتىندى حاتتاماسى باسقاشا شىقتى. كوميسسيا ەسەبىنشە، داۋىس بەرۋگە سايلاۋشىلاردىڭ 562-ءسى (62%-ى) قاتىسقان.

«ءادىل ءسوز» قورىنىڭ زاڭگەرى عاليا اجەنوۆانىڭ ازاتتىق راديوسى بەرگەن پىكىرىندە قاراعاندا، ناقتى جاعدايدا سايلاۋ ۋچاسكەسىنىڭ وكىلدەرى باقىلاۋشىلاردى ءاۋ باستان تەكسەرمەي، زاڭدى بۇزىپ وتىر.

«بۇل جەردە سايلاۋ ۋچاسكەسىنىڭ وكىلدەرى ءجۋرناليستى زالدان شىعارۋدىڭ امالىن ىزدەپ، تاپقانداعىسى سول پتر تەست بولىپ وتىر عوي. ولار پتر-تەستى تاڭەرتەڭ سۇراۋى كەرەك ەدى. جۋرناليست ۋچاسكەدەگى جاعدايدى بايانداعاننان كەيىن ونىڭ ارەكەتىنە سولايشا رەاكتسيا تانىتىپ وتىر. بۇل جەردە سايلاۋ ۋچاسكەسىنىڭ وكىلدەرى نەگە جۇرتتىڭ ءبارىن ءاۋ باستان تەكسەرمەگەن؟ نەگە ءتۇس كەزىندە كەنەتتەن ءجۋرناليستى تەكسەردى؟ دەگەن زاڭدى سۇراقتار تۋىندايدى»، – دەيدى زاڭگەر.

سايلاۋ كۇنى ءتۇس كەزىندە رەسمي دەرەكتەردە جامبىل وبلىسى قازاقستان اۋماعىندا سايلاۋشىلار قاتىسۋى جاعىنان العاشقى ورىندا تۇرعانى حابارلانعان. دەسە دە جەكەلەگەن جاعدايدا جۋرناليست تاپ بولعان وقيعا مەن رەسمي جانە رەالدى ەسەپتەگى ەلەۋلى ايىرماشىلىق ەرەكشە نازار اۋدارتادى. ءجۋرناليستى سايلاۋ ۋچاسكەسىنەن قۋ جاعدايىنا الماتى وبلىسى تالعار اۋدانىندا ساياسي ناۋقاننان اقپارات تاراتىپ جۇرگەن رەداكتسيا ءتىلشىسى الاتاۋ اۋىلدىق وكرۋگىندەگى №844 سايلاۋ ۋچاسكەسىندە دە ۇشىراستى.

"The Qazaq Times"