فوتو: گازەتا

ۆەنەسۋەلانىڭ مەملەكەت باسشىسى نيكولاس مادۋرو كەلەر جىلى ەلدە وتەتىن پرەزيدەنتتىك سايلاۋعا وپپوزيتسيالىق پارتيالار قاتىسا المايتىنىن حابارلادى. ول 2018 جىلى بولاتىن ساياسي دودادا جەكسەنبى كۇنى وتكەن اكىمدەردىڭ (مەر) سايلاۋىنا قاتىسقان پارتيالار عانا باق سىناي الاتىنىن جەتكىزدى. اپتانىڭ سوڭعى كۇنى بولعان اكىمدەردىڭ سايلاۋىنا Justice First, Popular Will and Democratic Action پارتيالارى سايلاۋدىڭ ادىلەتسىز وتەتىنى  تۋرالى الدىن الا مالىمدەمە جاساپ، ساياسي وقيعانىڭ ورتاسىندا بولۋدان باس تارتقان بولاتىن. بۇل تۋرالى ۆۆس اقپاراتتىق اگەنتتىگى جازدى. 

پرەزيدەنت ءوز سوزىندە ۆەنەسۋەلاداعى جۇيە سەنىمدى ءارى ادىلەتتى ەكەنىن ايتتى. ول سونداي-اق ەلدەگى وپپوزيتسيالىق پارتيالار ساياسي كارتادان جوعالىپ كەتكەنىن اتاپ ءوتتى. ۆەنەسۋەلاداعى ءۇش نەگىزگى وپپوزيتسيالىق پارتيا 300-گە جۋىق قالادا وتكەن اكىمدىكتەردىڭ سايلاۋىنا قاتىسۋدان قازان ايىندا باس تارتقان ەدى. ولار سايلاۋدىڭ نيكولاس مادۋرونىڭ ديكتاتورلىعىنا قىزمەت ەتەتىنىن ايتقان. ەل بيلىگىنە نارازى وپپوزيتسيونەرلەردىڭ پىكىرىنشە، بۇل سايلاۋدا دا ۆەنەسۋەلاداعى ەكونوميكالىق جاعدايدىڭ كۇردەلەنىپ جاتقانىنا قاراماستان، نيكولاس مادۋرو باسشىلىق ەتەتىن الەۋمەتتىك پارتيا باسىم ورىندارعا يە بولادى.

نيكولاس مادۋرو مەن وپپوزيتسيا اراسىنداعى كەلىسپەۋشىلىكتەر پرەزيدەنت كوپشىلىكتىڭ قارسىلىعىن ەسكەرمەستەن ءوز قولداۋشىلارىنىڭ باسىم بولىگى جينالعان ۇلتتىق اسسامبلەيا ينستيتۋتىن قۇرعان ساتتەن باستالدى. ۆۆس-ءدىڭ لاتىن امەريكاسىنداعى ءتىلشىسىنىڭ حابارلاۋىنشا، نيكولاس مادۋرو وپپوزيتسيانىڭ  بىرقاتار بەلدى مۇشەلەرىن اباقتىعا جاپقان. ونىڭ كەلەر جىلى وپپوزيتسيانى پرەزيدەنت سايلاۋىنا قاتىستىرماۋ تۋرالى شەشىمى ۇلكەن پروۆوكاتسيالىق داۋعا اينالعالى تۇر.

“The Qazaq Times”