سەرىكباي قاجى وراز، قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي

قادىرلى جاماعات!

بارشاڭىزعا قاسيەتتى قادىر كەشى مۇباراك بولسىن!

البەتتە، بۇل – اللا تاعالانىڭ مۇسىلمان ۇمبەتىنە دەگەن شەكسىز قامقورلىعى مەن راقىمى. ويتكەنى، مىڭ ايدى جىلدارعا شاعاتىن بولساق، سەكسەن ءۇش جىلدان استام مەزگىلدى قامتيدى. بۇل دەگەنىمىز – ءبىر ادامنىڭ ومىرىنە تاتيتىن ۋاقىت مولشەرى. ياعني، قادىر تۇنىندە حاق تاعالاعا ىنتى-شىنتىمەن قۇلشىلىق ەتكەن پەندە عۇمىر بويى قۇلشىلىق ەتكەن بولىپ سانالادى. ال، ءار جىل سايىنعى قادىر ءتۇنىن قاپەرگە الساق، وندا مۇسىلمان بالاسىنىڭ قامشىنىڭ سابىنداي قىسقا عۇمىردا جيناعان ساۋابىنان بيىك تاۋ تۇرعىزاتىنىن كوزگە ەلەستەتۋگە بولادى.

ءيا، قادىر ءتۇنىنىڭ قۇت-بەرەكەسى شەكسىز. سەبەبى، قاسيەتكە تولى بۇل كەشتە جەر بەتىنە سان مىڭداعان پەرىشتەلەر تۇسەدى. پەرىشتەلەر ءتىپتى جەر بەتىنە سىيماي، ءبىر-بىرىنە سىعىلىسادى. اللا ەلشىسىنىڭ (اللانىڭ وعان سالاۋاتى مەن سالەمى بولسىن) كەلەسى ءبىر حاديس-شاريفىندە: «ول ءتۇنى جەر بەتىنە تۇسكەن پەرىشتەلەردىڭ سانى ۇساق تاستاردىڭ سانىنان دا كوپ»، – دەپ حابارلايدى.

قاسيەتتى ءتۇندى قۇلشىلىقپەن وتكىزگەن مۇسىلمانعا پەرىشتەلەر سالاۋات ايتىپ، وعان بەيبىت ءومىر تىلەيدى.

قادىر تۇنىندە اللا ريزاشىلىعى ءۇشىن عيبادات جاساپ، ناماز وقىپ، قۇلدىق سەزىمدەردى ارتتىرۋ، قۇران كارىمدى وقىپ، تىڭداپ، تۇسىنۋگە ىنتا قويۋ، مەشىتكە بارىپ ۋاعىز-ناسيحات تىڭداۋ، جاببار حاققا تاۋبە مەن يستيعفار جاساۋ، اللا تاعالانى ۇلىقتاۋ، ەلىمىزدىڭ بىرلىگى مەن يگىلىگى، جەر بەتىندەگى كۇللى مۇسىلماندار ءۇشىن ءدايىم دۇعا جاساۋ – ساۋاپتى ءھام ابزال امالداردىڭ ءبىرى. 

قۇرمەتتى باۋىرلار!

قادىر ءتۇنىنىڭ مۇمكىندىگىنەن ماقۇرىم قالماي، تاڭ راۋانداعان شاققا دەيىن جانسەبىل رۋحتا حاققا قۇلشىلىق قىلىپ، جان-جۇرەگىمىزبەن الاش ءۇشىن دۇعا-تىلەك جاسايىق. اللا تاعالا رامازاننان رامازانعا امان-ەسەن جەتىپ، ءدايىم قاسيەتتى قادىر ءتۇنىن قارسى الا بەرۋدى جازسىن! ءامين!

“The Qazaq Times”