قر ءدىن ىستەرى جانە ازاماتتىق قوعام ءمينيسترى دارحان كالەتاەۆ، قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي سەرىكباي قاجى وراز

بۇگىن، 2018 جىلعى 9 ءساۋىر كۇنى قر ءدىن ىستەرى جانە ازاماتتىق قوعام ءمينيسترى دارحان كالەتاەۆ قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي سەرىكباي قاجى ورازبەن كەزدەستى دەپ حابارلادى قر ءدىن ىستەرى جانە ازاماتتىق قوعام مينيسترلىگىنىڭ ءباسپاسوز قىزمەتى.

كەزدەسۋ بارىسىندا ءدىن ىستەرى جانە ازاماتتىق قوعام مينيسترلىگى مەن قازاقستان مۇسىلماندارى ءدىني باسقارماسىنىڭ اراسىنداعى ىنتىماقتاستىق ماسەلەلەرى تالقىلانىپ، دىنارالىق كەلىسىمدى نىعايتۋ جانە ازاماتتاردىڭ ار-وجدان قۇقىقتارىن جۇزەگە اسىرۋ ماسەلەلەرى قارالدى.

دارحان كالەتاەۆ يمامداردىڭ، ءدىنتانۋشىلاردىڭ جانە ساراپشىلاردىڭ قاتىسۋىمەن اقپاراتتىق ءتۇسىندىرۋ جۇمىستارىن جەتىلدىرۋ بويىنشا بىرلەسكەن جۇمىستى جالعاستىرۋ قاجەتتىگىن اتاپ ءوتتى.

سونىمەن قاتار، مينيستر ءدىن سالاسىنداعى عالىمدار مەن شىعىستانۋشىلاردىڭ تاريحي مۇرانى جانە ءداستۇرلى يسلامنىڭ ۇلتتىق مادەنيەتپەن بايلانىسىن زەرتتەۋگە ارنالعان ارنايى جۇمىس توبىنىڭ قىزمەتىنە جانە مەملەكەتتىك دامۋدىڭ زايىرلى پرينتسيپتەرىنە نەگىزدەلگەن يدەولوگيانى قالىپتاستىرۋداعى يسلام ءدىنىنىڭ جاعىمدى ءرولىن قالىپتاستىرۋ باعىتىنداعى جۇمىستارعا قولداۋبىلدىرەتىنىن جەتكىزدى.

ال، باس ءمۇفتي سەرىكباي قاجى وراز ءوز كەزەگىندە دارحان كالەتاەۆتى مينيستر قىزمەتىنە تاعايىندالۋىمەن قۇتتىقتاپ، الداعى جۇمىسىنا تابىس تىلەدى.

كەزدەسۋ قورىتىندىسى بويىنشا تاراپتار ءدىن سالاسىنداعى مەملەكەتتىك ساياساتتى جۇزەگە اسىرۋدا تىعىز ىنتىماقتاستىققا دايىن ەكەندىكتەرىن ايتتى.

“The Qazaq Times”