فوتو: Reuters

ارگەنتينا اسكەري تەڭىز فلوتىنىڭ ءباسپاسوز حاتشىسى ەنريكە بالبي ەكى اپتا بۇرىن اشىق تەڭىزدە جوعالىپ كەتكەن سۋ استى كەمەسىنىڭ 44 مۇشەسىن قۇتقارۋ وپەراتسياسى ەش ناتيجە بەرمەگەنىن جەتكىزدى.  ARA San Juan سۋ استى كەمەسى سوڭعى رەت 15 قاراشا كۇنى بايلانىسقا شىققان. بۇل تۋرالى ۆۆس اقپاراتتىق اگەنتتىگى جازدى. 

جوعالعان ەكيپاجدى ىزدەستىرۋ شاراسىنا ءارتۇرلى مەملەكەتتەردەن 4 مىڭعا جۋىق تەڭىز قىزمەتكەرلەرى قاتىستى. ارگەنتينا اسكەري تەڭىز فلوتىنىڭ حالىقارالىق ارىپتەستەرىمەن بىرلەسكەن وپەراتسيالارى ەكى اپتا ىشىندە كوڭىل قۋانتارلىق جاڭالىقتار تابا المادى.

سەيسەنبى كۇنى كاپيتان بالبي جۋرناليستەرگە بەرگەن سۇحباتىندا سۋ استى كەمەسى اپاتىنىڭ بولجالدى نۇسقاسىمەن ءبولىستى. ونىڭ سوزىنشە، كەمەنىڭ تەڭىز بەتىندە قالاتىن، اۋا وتكىزەتىن تۇتىكشە تۇرىندەگى قۇبىرىنا سۋ قۇيىلىپ، ول وزگە ماڭىزدى بولشەكتەردى ىستەن شىعارعان بولۋى مۇمكىن.

كەمە جوعالعان ۋاقىتتان 8 كۇن وتكەننەن كەيىن، ۆەنادا ورنالاسقان يادرولىق سىناقتارعا بىرلەسىپ تىيىم سالۋ بويىنشا ۇيىم سۋ استى كەمەسى عايىپ بولعان اۋماقتان 60 كم قاشىقتىقتا گيدرواكۋستيكالىق تەربەلىس ورىن العانىن حابارلادى. ولاردىڭ سۋ استى جارىلىستارى مەن قوزعالىستارىن باقىلايتىن قۇرىلعىسىنا ىلىككەن دىبىستى ارگەنتينانىڭ اسكەري-تەڭىز فلوتى "سۋ استى كەمەسىنىڭ جارىلدى" دەپ باعالادى. بۇل اقپارات جوعالعان ەكيپاجدا جاقىندارى بولعان ازاماتتارعا اۋىر ءتيدى.

“The Qazaq Times”