ۆەنادا تاريحي كەلىسسوز: يران يادرولىق كەلىسىمى قايتا تالقىلانۋدا

يران مەن دەرجاۆالار اراسىندا يادرولىق كەلىسىمدى قايتا تالقىلاۋ ۆەنادا باستالدى. يران كەلىسسوز دەلەگاتسيسىن باستاپ بارعان ابباس اراقچي وتاندىق ارنالارىنا مالىمەت بەرىپ، العاشقى ادىمدا ماڭىزدى جەتىستىككە جەتكەندەرىن، الايدا تۇپكىلىكتى ماقساتقا جەتۋ ءۇشىن ءالى كوپ كەلىسسوزدەردىڭ تۇرعانىن ايتقان.

سەنبىدە ەۋروپا وداعى جاساعان رەسمي مالىمدەمەدە، ۆەناداعى كەلىسسوزگە ەو رەسمي تۇلعالارى مەن ۇلىبريتانيا، قىتاي، فرانتسيا، گەرمانيا، رەسەي جانە يران وكىلدەرى قاتىساتىنى ايتىلعان.

«تاراپتاردا جاڭا تۇسىنىستىك پايدا بولىپ جاتقان سياقتى، بارلىق تاراپتار تۇپكى ماقساتتا ورتاق پىكىرگە يە. الايدا، الدا تۇرعان جولىمىز تەگىس ەمەس، ال كەيبىر ەلەۋلى ايىرماشىلىقتار دا بار»، – دەگەن اراقچي مالىمدەمەسىندە.

كەلىسسوزگە قاتىسقان قىتاي وكىلى دە ءوز ەلىنىڭ اقپارات قۇرالدارىنا مالىمدەمە جاساعان. ونىڭ ايتۋىنشا، 2015 جىلعى كەلىسىمگە قول قويعان باسقا ەلدەر ماسەلەنى شەشۋگە كۇش سالۋعا كەلىسكەن. سونىڭ قاتارىندا اقش-تىڭ يرانعا قارسى سانكتسيا مەن تەھراندى كەلىسىمگە قايتارۋ ماقساتىندا قابىلداناتىن شارالاردى توقتاتۋ ماسەلەسى دە بار.

قالاي بولماسىن يراننىڭ كەلىسسوز ۇستەلىنە كەلۋىنىڭ ءوزى اسا ماڭىزدى جاڭالىق. وسى اپتادا يران بايىتىلعان ۋران كونتسەنتراتسياسىن 60 پايىزعا دەيىن ارتتىراتىندىعىن مالىمدەدى، بۇل الدىڭعى دەڭگەيدەن ءۇش ەسە جوعارى. وسىنىڭ ءوزى كەلىسىمگە ۇلكەن ىقپال ەتەرى داۋسىز. 60 پايىزعا بايىتىلعان ۋران يراننىڭ كەلىسسوزدەگى ۇپايىن ارتتىراتىن مىقتى كوزىرىنە اينالادى.

وتكەن اپتادا يراننىڭ ماڭىزدى يادرولىق كەشەنىنە كيبەر-شابۋىل جاسالعان بولاتىن. وعان جاۋاپ رەتىندە تەھران ۋران بايىتۋدىڭ جاڭا دەڭگەيىن جاريا ەتتى. ۆەنادا كەلىسسوز باستالعالى جاتقاندا يران مەملەكەتتىك ارنالارى ناتانز يادرولىق مەكەمەسىنە جاسالعان شابۋىلعا كۇدىكتى ازاماتتىڭ اتىن جاريالاعان. مالىمەتتە رەزا كاريمي ەسىمدى كۇدىكتىنىڭ شابۋىلدان بىرنەشە ساعات بۇرىن يراننان قاشىپ كەتكەنى ايتىلعان.

“The Qazaq Times”