جەەنبەكوۆ مينسك قالاسىندا نازارباەۆپەن كەزدەسەتىنىن ايتتى

مەن سامميت بارىسىندا نۇرسۇلتان ابىشۇلىمەن كەزدەسۋ وتكىزىپ، كەلىسسوز جۇرگىزەمىن – دەپ مالىمدەدى قىرعىزستان پرەزيدەنتى سوورونباي جەەنبەكوۆ جۋرناليستەر الدىندا سويلەگەن سوزىندە.

قاراشا ايىنىڭ 29-ى كۇنى رەسەي استاناسى ماسكەۋ قالاسىنا ءوزىنىڭ العاشقى رەسمي ءىس-ساپارىن جاساعان سوورونباي جەەنبەكوۆ جەرگىلىكتى باق وكىلدەرىنىڭ الدىندا سويلەگەن سوزىندە: «رەسەي ءبىزدىڭ باستى ستراتەگيالىق سەرىكتەسىمىز. مەن اسا قۇرمەتتى ۆلاديمير ۆلاديميروۆيچ پۋتينگە شاقىرعانى ءۇشىن العىس ايتقىم كەلەدى. ءبىز كەزدەسۋ بارىسىندا ەكى ەل اراسىنداعى ارىپتەستىك جايىندا، ەۋرازيالىق ەكونوميكالىق وداق اياسىندا بىرلەسىپ جۇمىس ىستەۋ جايىندا سويلەستىك. ماعان ۆلاديمير پۋتينگە ءبىرىنشى دارەجەلى ماناس وردەنىن تابىستاۋ مارتەبەسى بۇيىردى. مەن رەسەي تاراپى ءبىزدى جىلى قابىلداعانىنا وتە قۋانىشتىمىن» -دەگەن.

بۇدان بولەك سوورونباي جەەنبەكوۆ جۋرناليستەردىڭ: «ءسىز مينسك قالاسىندا وتەتىن ۇجىمدىق قاۋىپسىزدىك كەلىسىمى سامميتىندە قازاقستان پرەزيدەنتى نۇرسۇلتان نازارباەۆپەن كەزدەسەسىز بە؟» دەگەن سۇراعىنا: «مەن سامميت بارىسىندا بارلىق ەلدىڭ باسشىلارىمەن كەزدەسەمىن. نۇرسۇلتان ابىشۇلىمەندە كەزدەسۋ وتكىزىپ، كەلىسسوز جۇرگىزەمىن» - دەپ جاۋاپ بەرگەن.

ەستەرىڭىزگە سالايىق، بۇعان دەيىن قىرعىزستان پرەزيدەنت اكىمشىلىگىنىڭ سىرتقى ساياسات ءبولىمىنىڭ باسشىسى ايزادا سۋباقوجاەۆا: «مينسك قالاسىندا سوورونباي جەەنبەكوۆ قازاقستان پرەزيدەنتى نۇرسۇلتان نازارباەۆپەن كەزدەسپەيدى» دەپ مالىمدەگەن بولاتىن.

“The Qazaq Times”