فوتو: ايف كازان - ارگۋمەنتى ي فاكتى

رەسەي فەدەراتسياسىنىڭ ءبىلىم مينيسترلىگى ازىرلەگەن جاڭا زاڭ جوباسى بويىنشا، تاتارستان مەكتەپتەرىندە تاتار ءتىلىن وقۋ مىندەتتى ەمەس.

تاتارستان باس پروكۋرورى جۇلدىز نافيكوۆتىڭ سوزىنشە، رف ءبىلىم مينيسترلىگى تاتارستان ۇكىمەتىنىڭ ۇسىنىسىمەن جاڭا زاڭ جوباسىن جاساعان. جاڭا زاڭ جوباسى بويىنشا، وسىدان بىلاي بارلىق بالالار اتا-انالارىنىڭ جازباشا رۇقساتىمەن ەرىكتى تۇردە تاتار ءتىلىن اپتاسىنا ەكى ساعات وقۋعا قۇقىلى. ءبىلىم مينيسترلىگىنىڭ بۇنداي شەشىم شىعارۋىنا وسى ۋاقىتقا دەيىن ورتا مەكتەپتەردە وقۋشىلارعا ءبىلىم الۋ تاڭداۋى جاسالماعاندىعى سەبەپ بولعان.

بۇعان دەيىن تاتارستان قوعامىندا تاتار ءتىلىن ورتا مەكتەپتەردە مىندەتتى تۇردە وقىتۋعا بايلانىستى قىزۋ پىكىر تالاس جۇرگەن بولاتىن. وسىدان كەيىن ەل پرەزيدەنتى رۋستام ميننيحانوۆ پەن ءبىلىم جانە عىلىم مينيسترلىگى وكىلدەرى: «جاڭا وقۋ ستاندارتتارى قابىلدانعانان كەيىن، تاتار ءتىلىن باستاۋىش جانە ورتا مەكتەپتەردە وقىتۋ مىندەتتى بولىپ قالا بەرەدى. بىراق تاتار ءتىلىن وقىتۋعا اپتاسىنا ەكى ساعات قانا ۋاقىت بولىنەدى. ال بالا جوعارى سىنىپتارعا كوشكەندە تاتار ءتىلىن وقۋ وقۋشىنىڭ اتا-اناسىنىڭ تاڭداۋىنا بەرىلەدى» - دەپ مالىمدەگەن.

قازىرگى تاڭدا تاتارستاندا ءتىل ماسەلەسى وتە قيىن جاعدايدا. ويتكەنى ءوزىنىڭ انا تىلىندە سويلەيتىن تاتارلاردىڭ سانى جىل وتكەن سايىن ازايىپ بارادى. ايتا كەتەتىن ءبىر جايت، قازاقستان لاتىن الىپبيىنە كوشەدى دەگەن اقپارات تاراعاندا وزگە ەلدەرمەن قاتار تاتارستاندا بۇل جاڭالىقتى قىزۋ تالقىلاعان. سەبەبى تاتار حالقىنىڭ ويىنشا، قازاقستان لاتىن الىپبيىنە كوشەتىن بولسا، وندا ەكى ەل اراسىنداعى رۋحاني جانە مادەني بايلانىس ءۇزىلىپ قالۋى مۇمكىن.

“The Qazaq Times”