ەرتەڭ سوورونباي جەەنبەكوۆ ۆلاديمير پۋتينمەن كەزدەسەدى

قىرعىزستان پرەزيدەنتى سوورونباي جەەنبەكوۆ رەسەي باسشىسى ۆلاديمير پۋتينمەن كەزدەسەدى.

بۇگىن رف پرەزيدەنتىنىڭ ءباسپاسوز حاتشىسى دميتري پەسكوۆ جۋرناليستەر الدىندا سويلەگەن سوزىندە: «قاراشا ايىنىڭ 29-ى كۇنى قىرعىزستان پرەزيدەنتى سوورونباي جەەنبەكوۆ ماسكەۋ قالاسىنا رەسەي باسشىسى ۆلاديمير پۋتينمەن كەزدەسۋگە كەلەدى. الداعى ۋاقىتتا پرەزيدەنت اكىمشىلىگىنىڭ ءباسپاسوز قىزمەتى بۇل جايىندا تولىققاندى اقپارات تاراتاتىن بولادى» - دەگەن.

كرەمل ءباسپاسوز قىزمەتى تاراتقان مالىمەت بويىنشا، ەكى ەل باسىشىلارى كەزدەسۋ بارىسىندا رەسەي مەن قىرعىزستان اراسىنداعى قارىم-قاتىناس جايىندا، ساۋدا-ەكونوميكالىق، اسكەري-تەحنيكالىق، مادەني-گۋمانيتارلىق سالالار بويىنشا كەلىسسوزدەر جۇرگىزبەك. بۇدان بولەك پۋتين مەن جەەنبەكوۆ ەۋرازيالىق ەكونوميكالىق وداق اياسىندا بىرلەسىپ جۇمىس ىستەۋ جونىندە اڭگىمە قوزعايدى دەپ كۇتىلۋدە.

ەستەرىڭىزگە سالايىق، سوورونباي جەەنبەكوۆ پرەزيدەنتتىك قىزمەتىنە قاراشا ايىنىڭ 24-ءى كۇنى كىرىسكەن. ول بۇعان دەيىن تاسس اقپارات اگەنتتىگىنە بەرگەن سۇحباتىندا: «رەسەي ءبىزدىڭ باستى ستراتەگيالىق ارىپتەسىمىز» دەگەن بولاتىن. كوپتەگەن ساراپشىلار ونىڭ العاشقى رەسمي ءىس-ساپارىن رەسەيدەن باستاۋىن المازبەك اتامباەۆپەن بايلانىستىرادى. ويتكەنى اتامباەۆ تا وسىدان التى جىل بۇرىن ءوزىنىڭ العاشقى رەسمي ءىس-ساپارىن ءدال وسى رەسەيدەن باستاعان بولاتىن. اتامباەۆ التى جىل پرەزيدەنتتىك مەرزىمىندە رەسەيمەن تىعىز بايلانىس ورناتقان.

“The Qazaq Times”