قازاقستانداعى ەۋروپالىق قايتا قۇرۋ جانە دامۋ بانكى «ىسكەر ارۋلارعا ارنالعان تالىمگەرلىك»  باعدارلاماسىنىڭ توعىز ايداعى ناتيجەسىن جاريالادى. باعدارلاماعا تالىمگەرلەر مەن شاكىرتتەردى قوسا العاندا 28 جۇپ قاتىسقان. 

وسى جىلدىڭ اقپان ايىنان قازان ايىنا دەيىن قازاقستاندا بيزنەس جۇرگىزۋ بويىنشا جان-جاقتى تاجىريبەسى بار تابىستى كاسىپكەرلەر ايماقتاردا بيزنەسىن جاڭادان جۇرگىزىپ جاتقان كاسىپكەر ارۋلارعا كاسىبي جانە جەكە قۇزىرەتىن
جەتىلدىرۋگە جانە ىسكەر بايلانىستاردى كەڭەيتۋگە كومەكتەسكەن.

باعدارلاماعا قاتىسۋشىلاردىڭ ساۋالناماسى بويىنشا  تالىمگەرلەردىڭ 87%-ى مەن  شاكىرتتەردىڭ 89%-ى باعدارلاما باسىندا العان قويعان ماقساتتارىنا تولىقتاي نەمەسە جەكەلەي قول جەتكىزگەن.

باعدارلاما قاتىسقان تالىمگەرلەردىڭ ءبىرى، بيزنەس-ترەنەر عاني ابادان بيزنەس باستاعان ايەلدەردىڭ كەمىندە ونىنىڭ توعىزى ونى اياعىنا دەيىن جەتكىزەتىنىن ايتادى.

بيزنەس ترەنەر عاني ابادان. فوتو: QT

"ايەلدەردىڭ كاسىپكەرلىگىن قولداۋ ترەندكە اينالدى. ەر ادامدار بيزنەسپەن اينالىسۋ تۋرالى ۇزاق ويلانبايدى، تەز شەشىم قابىلدايدى. ولار ءۇشىن بيزنەس باستاۋدا قاۋىپ دەڭگەيى تومەن. سوندىقتان بىزگە ءبىر جوبانى ۇسىنعاندا ونى بىردەن باستاپ كەلەمىز. ال ايەلدەر ۇزاق ويلانادى. مىسالى ەر ادام ءبىر بيزنەستى باستاسا ءبىر جىلدان كەيىن ودان اينىپ قالۋى مۇمكىن. ال ايەلدەر ءبىر بيزنەستى باستاسا، كەمىندە ونىنىڭ توعىزى اياعىنا دەيىن جەتكىزەدى. وسى سەبەپتەن مەن ايەلدەر كاسىبىنە كوڭىل ءبولىنۋ كەرەك دەپ ويلايمىن", - دەيدى بيزنەس-ترەنەر عاني ابادان.

ال باعدارلاماعا قاتىسۋشى شاكىرت «ازايا» تىگىن كومپانياسىنىڭ ديرەكتورى اينۇر باقتىعاليەۆا جوباعا قاتىسقاننان كەيىن اقتوبە قالاسىندا جۇمىسسىز جۇرگەن ايەلدەرگە ارنالاعان وقۋ ورتالىعىنىڭ اشىلعانىن ايتادى. اينۇر باقتىعاليەۆاعا تاۋەلسىز ساراپشى جانات بەردالينا تالىمگەر بولعان.

جوباعا قاتىسۋشى شاكىرت «ازايا» تىگىن كومپانياسىنىڭ ديرەكتورى اينۇر باقتىعاليەۆا. فوتو: QT

ء"بىز بۇل جوباعا قاتىسپاي تۇرىپ، كومپانيا ءوزىنىڭ بەلگىلى ءبىر دارەجەسىنە جەتكەندەي كورىندى. ارى قاراي "قالاي داميمىز، نە ىستەيمىز؟ تاعى ءبىر جۇمىس ورنىن اشقان سوڭ ارى قاراي ءونىمدى بولا ما؟" دەگەن سۇراق تۋىندادى. ويتكەنى ءبىزدىڭ سالادا باسەكە جوعارى. كيىمدەر كورشى ەلدەردەن دە كەلىپ جاتىر. وسىدان كەيىن ءبىز جوباعا قاتىسۋ ارقىلى جانات قولانقىزىنىڭ ۇسىنىسىمەن وقۋ ورتالىعىن اشۋدى ءجون كوردىك. سودان وسى جىلدىڭ قىركۇيەك ايىندا وقۋ ورتالىعى اشىلدى. وندا اقتوبە قالاسىنداعى جۇمىسسىز  ايەلدەردى جيناپ، ءۇش ايلىق تەگىن كۋرستى وقىتىپ جاتىرمىز", - دەيدى اينۇر قايسارقىزى.

جالپى ەقدب-نىڭ «بيزنەستەگى ارۋلار» باعدارلاماسى 2015 جىلى قاراشا ايىندا ىسكە قوسىلعان. باعدارلامانى قازاقستان رەسپۋبليكاسىنىڭ ۇكىمەتى جانە ەقدب قارجىلاندىرادى. قارجىمەن قوسا ەقدب شاعىن جانە
ورتا بيزنەسكە ءوندىرىستى جانە باسەكەلەستىكتى ارتتىرۋعا باعىتتالعان زاماناۋي باسقارۋ تاجىريبەسىن جانە تەحنولوگياسىن ەنگىزۋگە نوۋ-حاۋ الۋعا مۇمكىندىك بەرەدى.

“The Qazaq Times”