ۇلتتىق بانك باعدارلاماسىنا قاتىساتىن ەۋرازيالىق بانكتىڭ شىعىندارى كوبەيگەن

2017 جىلدىڭ قاڭتار-قىركۇيەك ايلارىندا ەۋرازيالىق بانك 9,7 ملرد تەڭگە كولەمىندە شىعىنعا باتقان، دەپ حابارلايدى LS.

2016 جىلدىڭ ەسەپتىك كەزەڭىمەن سالىستىرعاندا (3,4 ملرد تەڭگە) بۇل كورسەتكىش 2,8 ەسەگە وسكەن.

ال الىق سالىنعانعا دەيىنگى شىعىن 9,7 ملرد تەڭگەنى قۇراپ، 2,2 ەسەگە وسكەن (4,3 ملرد تەڭگەدەن باستاپ).

بانكتىڭ وپەراتسيالىق كىرىسى 0,6%-عا نەمەسە 31,3 ملرد تەڭگەگە دەيىن ۇلعايعان. تازا پايىزدىق كىرىسى 14,9%-عا، ياعني 27,5 ملرد تەڭگەدەن 23,4 ملرد تەڭگەگە دەيىن قىسقارعان. تازا كوميسسيالىق كىرىسى 67,7%-عا ارتىپ، 12,2 ملرد تەڭگەگە دەيىن جەتكەن.

2017 جىلدىڭ 30 قىركۇيەگىندەگى جاعداي بويىنشا بانك اكتيۆتەرى 971,3 ملرد تەڭگەنى قۇرادى، ءبىر جىل بۇرىن 1 ترلن تەڭگەدەن ءسال اسقان. بۇدان كورسەتكىش 3,3 %-عا تومەندەگەنىن بايقاۋعا بولادى.

بۇدان بولەك، كومپانيا كاپيتالى 3%-عا نەمەسە 92,3 ملرد تەڭگەگە دەيىن تومەندەسە، مىندەتتەمەلەرى 3,4%-عا (878,9 ملرد تەڭگەگە دەيىن) ازايعان.

ايتا كەتەيىك، وسىعان دەيىن قر ۇلتتىق بانكىنىڭ ەكىنشى دەڭگەيلى بانكتەردىڭ قارجىلىق ورنىقتىلىعىن ارتتىرۋ باعدارلاماسىنا قاتىساتىن بانكتەردىڭ اتىن اتاعان. ەۋرازيالىق بانك وسى تىزىمدە بار.

“The Qazaq Times”