ۇلتتىق بانك تەڭگە كۋرسىن رەتتەۋ ءۇشىن ينتەرۆەنتسيانى ارتتىرعان

ۇلتتىق بانك تەڭگەنىڭ ايىرباس باعامىن رەتتەۋ ءۇشىن ءۇشىنشى اي قاتارىنان ينتەرۆەنتسيا وتكىزىپ كەلەدى. Finprom اگەنتتىگىنىڭ مالىمەتىنشە، رەتتەۋشى قازان ايىندا دوللارعا سۇرانىستى ازايتۋ كەزىندە وتكەن ايعا قاراعاندا كوپ قارجى جۇمساعان.

ۇلتتىق بانكتىڭ دوللار بويىنشا نەتتو-ساتىلىمى قازان ايىندا 379,8 ملن دوللاردى قۇراعان. قىركۇيەك ايىندا بۇل سوما 69,7 ملن دوللار، تامىز ايىندا 70 ملن دوللار بولعان.

جاز ايى باستالعالى بەرى ۆاليۋتا نارىعىنداعى جاعداي ايتارلىقتاي وزگەرگەنى بەلگىلى. 2016 جىلدىڭ جەلتوقسانى مەن 2017 جىلدىڭ مامىر ايى ارالىعىندا دوللار قۇنى تۇسكەنمەن، ماۋسىم ايىنان باستاپ، قايتا نىعايا باستادى. مىسالى وسى ايدا تەڭگە 3,2%-عا، شىلدەدە 1,8%-عا، تامىزدا 2,7%-عا، قىركۇيەكتە 1,2%-عا السىرەدى.

ۇلتتىق بانك بولسا بۇل جاعدايدى دوللارعا دەگەن سۇرانىستىڭ ارتۋىمەن جانە كەيبىر ساراپشىلاردىڭ ورىنسىز دەۆالۆاتسيالىق بولجامدارىمەن بايلانىستى دەپ ءتۇسىندىردى. ۇلتتىق بانك ينتەرۆەنتسيا جۇرگىزۋدى تامىز ايىندا قايتا باستاعان. الايدا ۆاليۋتا رەزەرۆىندە تۇرعان دوللارلاردى ساتۋدان سۇرانىس ازايا قويماعان.

ايتا كەتەيىك، وسىدان ەكى جىل بۇرىن 2015 جىلدىڭ 20 تامىزىندا تەڭگە كۋرسى ەركىن اينالىمعا جىبەرىلگەن سوڭ، ۇلتتىق بانك دوللارعا سۇرانىسقا ازايتۋ ءۇشىن بىرنەشە اي ينتەرۆەنتسيا جۇرگىزگەن. الايدا بۇدان تەڭگە باعامى تۇراقتالىپ قالعان جوق. كەرىسىنشە ۇلتتىق ۆاليۋتا 50%-عا دەيىن قۇنىن جوعالتقان بولاتىن.

“The Qazaq Times”