قىرعىزستان دسۇ شتاب پاتەرىندە قازاق-قىرعىز شەكاراسىنداعى داۋعا قازاقستاندى كىنالادى

قىرعىزستان دۇنيەجۇزى ساۋدا ۇيىمىنىڭ شتاب پاتەرىندە قازاق-قىرعىز شەكاراسىنداعى داۋ جايىندا مالىمدەمە جاسادى.

قاراشا ايىنىڭ 10-ى كۇنى قىرعىزستان دەلەگاتسياسى دۇنيەجۇزى ساۋدا ۇيىمىنىڭ تاۋار ساتۋ كەڭەسىنىڭ وتىرىسىنا قاتىسقان. وندا قىرعىزستان ەكونوميكا ءمينيسترىنىڭ ورىنباسارى الماز سازباقوۆ دسۇ كەڭەس مۇشەلەرى مەن وتىرىسقا قاتىسۋشىلارعا قازاق-قىرعىز شەكاراسىندا قازاقستان تاراپىنىڭ قىرعىزستان تاۋارلارىن ءوز اۋماعىنا نەگىزسىز وتكىزبەي وتىرعاندىعىن ايتقان. سازباقوۆ سوزىنشە، قازاقستان بيلىگى قىرعىزستان تاۋارلارىن شەكارادان وتكىزبەۋ ارقىلى دسۇ قاعيدالارىنا قايشى كەلۋدە جانە رەسمي استانانىڭ بۇل ارەكەتى حالىقارالىق ۆاليۋتا قورىنىڭ مالىمەتىنشە، قىرعىزستاندى 200 ميلليون دوللار شىعىنعا باتىرعان. بۇل قىرعىز ەكونوميكاسىنىڭ ءوسىمى سوڭعى ءبىر ايدا 0,3 پايىزعا تومەندەتكەن.

قىرعىزستاننىڭ دۇنيەجۇزى ساۋدا ۇيىمىنا شاعىم ءتۇسىرۋىن اتالمىش ۇيىمداعى قازاقستان دەلەگاتسياسى قالىپتى جاعداي رەتىندە قابىلداعان. قازاقستان تاراپى شەكارانىڭ كۇشەيتىلگەن رەجيمدە جۇمىس ىستەۋى مەن قىرعىزستان تاۋارلارىنىڭ ەلگە جىبەرىلمەۋىن قىرعىز ونىمدەرىنىڭ سانيتارلىق، فيتوسانيتارلىق تالاپتارعا ساي ەمەس ەكەندىگىمەن تۇسىندىرگەن.

قازاق-قىرعىز شەكاراسىنداعى داۋدى دۇنيەجۇزى ساۋدا ۇيىمىنىڭ جاپونيا، وڭتۇستىك كورەيا جانە مولدوۆا سىندى مۇشەلەرى تەز ارادا ەكىجاقتىق كەلىسسوزدەر ارقىلى شەشۋ كەرەكتىگىن ايتقان.

“The Qazaq Times”