شەتەل ۆاليۋتاسىمەن سالىنعان دەپوزيتتەردىڭ سىياقى مولشەرلەمەسى تومەندەيدى

2017 جىلدىڭ 1 جەلتوقسانىنانان باستاپ بانكتەردەگى شەتەل ۆاليۋتاسىنداعى دەپوزيتتەردىڭ مولشەرلەمەلەرىنىڭ ەڭ جوعارى دەڭگەيى  1%-عا دەيىن تومەندەتىلەدى. بۇل تۋرالى قازاقستاننىڭ دەپوزيتتەرگە كەپىلدىك بەرۋ قورى حابارلادى. 

قوردىڭ مالىمەتىنشە، جەكە تۇلعالاردىڭ جاڭادان تارتىلعان ۇلتتىق ۆاليۋتاداعى دەپوزيتتەرى بويىنشا ەڭ جوعارعى سىياقى مولشەرلەمەلەرى بۇرىنعى دەڭگەيدە، 14% بولىپ ساقتالادى.

ال شەتەل ۆاليۋتاسىنداعى ەڭ جوعارعى سىياقى مولشەرلەمەسى 1 % بولادى.

"قازىرگى ۋاقىتتا قورمەن ۇسىنىلاتىن جەكە تۇلعالاردىڭ جاڭادان تارتىلعان شەتەل ۆاليۋتاسىنداعى دەپوزيتتەرى بويىنشا ەڭ جوعارعى سىياقى 1,5% مولشەرلەمەلەرى 1 جەلتوقسانىنان باستاپ 1% دەيىن تومەندەتىلەدى. جاڭادان تىركەلگەن جەكە تۇلعالاردىڭ تەڭگە باعامىنداعى دەپوزيتتەرى بويىنشا سىياقى مولشەرى بۇرىڭعى دەڭگەيدە، ياعني 14 پايىز كولەمىندە ساقتالادى. الايدا قوردىڭ ديرەكتورلار كەڭەسى جانە/نەمەسە اكتسيونەرى دەپوزيت نارىعى كونيۋنكتۋراسىنىڭ كۇرت وزگەرۋى جاعدايىندا اتالمىش مولشەرلەمەلەردى قايتا قاراستىرۋى مۇمكىن", - دەلىنگەن ءباسپاسوز حابارلاماسىندا.

ايتا كەتەيىك، بۇدان بۇرىن ۇلتتىق بانك توراعاسى دانيار اقىشەۆ قازاقستاننىڭ دەپوزيتتەرگە كەپىلدىك قورىمەن (قدكق) بەكىتىلگەن تەڭگەدە سالىنعان دەپوزيتتەردىڭ ەڭ جوعارعى ءتيىمدى سىياقى مولشەرلەمەسى وزگەرىسسىز قالاتىنىن مالىمدەگەن.

“The Qazaq Times”