يسپانيا بيلىگى كاتالونيا ۇكىمەتىنىڭ مۇشەلەرىن تۇتقىنعا الىپ جاتىر

يسپانيا سوتى كاتالونيا ۇكىمەتىنىڭ بۇرىنعى 8 مۇشەسىن تۇتقىنداۋ تۋرالى شەشىم قابىلدادى. بۇل تۋرالى RT اقپارات اگەنتتىگى حابارلادى. 

كاتالونيا ۇكىمەتى باسشىسىنىڭ ورىنباسارى ۋريول جۋنكەراس دا ۇستالعان. ال تاۋەلسىزدىك جاريالانعانعا دەيىن وتستاۆكاعا كەتكەن كاتالونيا ۇكىمەتىنىڭ بۇرىنعى كەڭەسشىسى سانتي ۆيلا 50 مىڭ ەۋرو كولەمىندە وتەماقى تولەسە بوستاندىقتا قالۋى مۇمكىن.

بۇدان بولەك يسپانيا بيلىگى كاتالونيانىڭ بۇرىنعى باسشىسى كارلەس پۋدجەمونتتى تۇتقىنداۋعا حالىقارالىق وردەر بەرۋ تۋرالى شەشىم قابىلدادى. سەبەبى ول جانە ونىڭ ءتورت كەڭەسشىسى سوتتا بولماعان.

ايتا كەتەيىك، 1 قازاندا كاتالونيا پرەزيدەنتى كارلەس پۋدجەمونت تاۋەلسىزدىك الۋ ماقساتىندا وتكىزىلگەن رەفەرەندۋم جەڭىسكە جەتكەنىن حابارلاعان ەدى. رەفەرەندۋمعا كاتالونيا ازاماتتارىنىڭ 43,2 پايىزى قاتىسىپ، داۋىس بەرگەندەردىڭ 90 پايىزى تاۋەلسىزدىكتى قولدايتىندارىن بىلدىرگەن. يسپانيا بيلىگى ەل تۇتاستىعىن ساقتاپ قالۋ ءۇشىن قولىنان كەلگەننەن ايانبايتىنىن ايتقان ەدى.

الايدا بۇل رەفەرەندۋم كاتالونيالىقتارعا وڭاي تيگەن جوق. ءتىپتى يسپانيا بيلىگى تاراپىنان ايىپ تاعىلىپ، باس بوستاندىعىنا قاۋىپ تونگەن كاتالونيانىڭ بۇرىنعى باسشىسى كارلەس پۋدجەمونتتىڭ ءوزى بەلگيا استاناسى بريۋسسەلدە جۇرگەنى تۋرالى حابار تارادى. وزىنە قارسى تاعىلعان ايىپتاردان باس ساۋعالاپ، بريۋسسەلگە كەلگەن كارلەس پۋدجەمونت ارى قاراي بارلىق جولداردى قاراستىرىپ كورەتىنىن جەتكىزدى.

“The Qazaq Times”