بريۋسسەلدە كاتالونيانىڭ تاۋەلسىزدىگىن قولداۋشىلاردىڭ شەرۋى ءوتتى

بريۋسسەلدە كاتالونيانىڭ تاۋەلسىزدىگىن قولداۋشىلاردىڭ شەرۋى ءوتتى. 45 مىڭعا جۋىق شەرۋ قاتىسۋشىلارى ەۋرووداقتىڭ شتاب-پاتەرىنىڭ جانىندا قىزىل، سارى جانە كوك ءتۇستى كاتالونيانىڭ تۋىن ۇستاپ، "ويان، ەۋروپا!" دەپ ۇرانداتتى. ولار ەۋرووداقتىڭ كاتالونياداعى ساياسي داعدارىس كەزىندە يسپانيانى قولداعانىنا نارازى. بۇل تۋرالى AFP اقپاراتتىق اگەنتتىگى جازدى. 

جينالعان كوپشىلىكتىڭ الدىنا شىعىپ، ءسوز سويلەگەن كاتالونيانىڭ بۇرىنعى باسشىسى: "سىزدەر بۇرىن-سوڭدى قىلمىسكەرلەردى قولداعان شەرۋدى كورگەنسىز بە؟ جوق!",- دەدى. ول بۇل پىكىرى ارقىلى يسپانيانىڭ وزىنە قاتىستى ايىپ تاعىپ وتىرعانىن مەڭزەگەن سياقتى. سەپاراتيستىك قوزعالىس قاتىسۋشىلارى كارلەس پۋدجەمونتقا "پرەزيدەنت، پرەزيدەنت" دەپ ايقايلادى.

AFP تىلشىلەرىنىڭ وقيعا ورنىنان جاساعان رەپورتاجىندا شەرۋ قاتىسۋشىلارى ەۋروپا مەملەكەتتەرىنىڭ يسپانيا بيلىگىنىڭ كاتالونيادا وتكەن رەفەرەندۋم قورىتىندىلارىن قابىلداۋىنا ىقپال ەتۋىن تالاپ ەتەتىندەرىن ايتادى. 73 جاستاعى مونتسەررات مانتە: ء"بىز بۇگىن ەۋروپاعا  يسپانيادا دەموكراتيا جوقتىعىن ايتۋعا،  كورسەتۋگە كەلدىك", -دەيدى.

ۇيىمداستىرۋشىلار شەرۋگە 20 مىڭعا جۋىق ادام كەلەدى دەپ كۇتكەن. ناتيجە الدىن-الا بولجاعان ساننان ەكى ەسەگە ارتىق بولدى. كاتالاندىقتاردىڭ كوبى تۇندەلەتىپ كولىك، اۆتوبۋسپەن 1 مىڭ 300 كم ەڭسەرىپ كەلگەن.

يسپانيا وسى اپتادا باس بوستاندىعىنان ايىرىلۋ قاۋپىنەن ساقتانىپ، بريۋسسەلگە كەتكەن كارلەس پۋدجەمونت پەن كاتالونيانىڭ بۇرىنعى 4 مينيسترىنە جاريالانعان ەۋروپالىق تۇتقىنداۋ تۋرالى وردەردىڭ كۇشىن جويعانىمەن، ەكس-باسشىلار ءالى دە وتاندارىنا ورالۋ تۋرالى شەشىم قابىلدامادى.

يسپانيا پرەمەر-ءمينيسترىنىڭ ورىنباسارى سورايا سانتاماريا 21 جەلتوقساندا وتەتىن كاتالونيا پرەزيدەنتىنىڭ سايلاۋىنا قاتىسۋعا نيەت بىلدىرگەن كارلەس پۋدجەمونتتى: "ادەتتە كانديداتتار سايلاۋالدى كامپانياسىن وتكىزىپ، حالىقتىڭ الدىنا كەلۋشى ەدى. بۇگىن سايلاۋشىلار كانديداتتىڭ الدىنا وزدەرى بارىپ وتىر" دەپ، كەلەكە قىلدى.

“The Qazaq Times”