فوتو: inform.kz

رەسەي قازاق ءتىلىنىڭ لاتىن گرافيكاسىنا وتۋىنە تۇسىنىستىكپەن قارايدى. مۇنداي پىكىردى رەسەيدىڭ قازاقستانداعى توتەنشە جانە وكىلەتتى ەلشىسى ميحايل بوچارنيكوۆ مالىمدەدى.

"قازاقستان - كونستيتۋتسياسىندا ورىس تىلىنە رەسمي ستاتۋس بەرگەن مەملەكەتتەردىڭ ءبىرى. رەسەي تاۋەلسىز قازاقستاننىڭ مەملەكەتتىك ءتىلىنىڭ لاتىن گرافيكاسىنا ءوتۋى تۋرالى شەشىمىنە تۇسىنىستىكپەن جانە قۇرمەتپەن قارايدى", - دەدى ول استانادا ءوتىپ جاتقان قر  پارلامەنت ءماجىلىسى مەن رەسەيدىڭ مەملەكەتتىك دۋماسى پارلامەنتاريلەرىنىڭ كەزدەسۋىندە.

ونىڭ سوزىنشە، قازاقستاندا ورىس ءتىلى پوزيتسياسىنىڭ ساقتالىپ قالۋى ماڭىزدى.

"پرەزيدەنت نۇرسۇلتان نازارباەۆ جانە قر رەسمي وكىلدەرىنىڭ مالىمدەمەلەرىنە سۇيەنسەك، ورىس ءتىلىنىڭ پوزيتسياسى ساقتالىپ قالادى، ورتا مەكتەپتەردە ورىس تىلىنەن ساباق وتكىزۋ جالعاسا بەرەدى. سەبەبى قازاقستان ازاماتتارىنىڭ ورىس ءتىلىن ەركىن سويلەۋى - رەسپۋبليكا جەتەكشىلەرى ءۇشىن قازاقستاننىڭ مادەني ارتىقشىلىعى", - دەدى بوچارنيكوۆ.

ايتا كەتەيىك، بۇدان بۇرىن نۇرسۇلتان نازارباەۆ اقمولا وبلىسىنىڭ بۋراباي كەنتىندە «حابار» تەلەارناسىنا سۇحبات بەرۋ كەزىندە "لاتىن الىپبيىنە كوشۋ ورىس تىلىنەن باس تارتۋ دەگەن ءسوز ەمەس" دەگەن ەدى.

"لاتىن الىپبيىنە كوشۋ ورىس تىلىنەن نەمەسە كيريلليتسادان باس تارتۋ دەگەن ءسوز ەمەس. ورىس تىلىندە شىعاتىن بارلىق باسىلىمدار بۇرىنعىداي شىعا بەرەدى، ياعني قازاقستاننىڭ  ورىس ءتىلدى ازاماتتارى ءۇشىن كيريلليتسا قالادى", - دەگەن پرەزيدەنت سۇحبات بارىسىندا.

ال وسىدان كەيىن قوعامدا ءارتۇرلى پىكىر پايدا بولدى. ءبىرى پرەزيدەنتتىڭ بۇل سوزىنەن كەيىن "ەندەشە جاڭا الىپبيگە كوشۋدىڭ نە قاجەتى بار؟" دەسە ەندى ءبىرى "قازاقستان ءۇشىن ورىس ءتىلى ءالى دە ۇستەم" بولاتىنىن ايتقان.

“The Qazaq Times”