ەردوعان: ءبىز وزبەكستاننىڭ مىقتى مەملەكەت بولعانىن قالايمىز

ءبىز بارلىق سالادا وزبەكستاننىڭ مىقتى مەملەكەت بولعانىن قالايمىز - دەدى تۇركيا پرەزيدەنتى رەجەپ تايىپ ەردوعان وزبەكستان باسشىسى شاۆكات ميرزيەەۆپەن كەزدەسۋىندە.

قازان ايىنىڭ 25-ءسى كۇنى وزبەكستان پرەزيدەنتى شاۆكات ميرزيەەۆتىڭ تۇركياعا رەسمي ءىس-ساپارى باستالدى. بۇل وزبەكستان باسشىسىنىڭ اراعا 20 جىل سالىپ تۇركياعا العاش كەلۋى. وسىعان بايلانىستى رەجەپ تايىپ ەردوعان شاۆكات ميرزيەەۆتى ءوزىنىڭ انكاراداعى رەزيدەنتسياسىندا جەكە قابىلداپ: «بۇل وزبەكستان باسشىسىنىڭ اراعا 20 جىل سالىپ انكاراعا العاش رەت ات باسىن بۇرۋى. ءبىز ءۇشىن بۇل وتە ماڭىزدى كەزدەسۋ. بۇگىن ءبىز 22 قۇجاتقا قول قويدىق. ەرتەڭ تاعى ءتورت قۇجاتقا قول قوياتىن بولامىز. قازىرگى ۋاقىتتا ەكى ەل اراسىنداعى تاۋار اينالىمى 1,2 ميلليارد دوللاردى قۇرايدى. بىراق بۇل ءبىز قالاعان دەڭگەيدەن الدە قايدا تومەن كورسەتكىش. ءبىز بارلىق سالادا وزبەكستاننىڭ مىقتى مەملەكەت بولعانىن قالايمىز» - دەگەن.

ال ءوز كەزەگىندە شاۆكات ميرزيەەۆ: «20 جىلدىق ۇزىلىستەن كەيىن ءبىز ءبىر-ءبىرىمىزدى ساعىنىپ قالىپپىز. قازىر ءبىز ءبىر-ءبىرىمىزدى ەشقانداي ءسوزسىز اق ءتۇسىنىپ وتىرمىز. ەكى باۋىرلاس ەل اراسىندا ۆيزا ماسەلەسى بولماۋى ءتيىس. بۇل ماسەلەنى جوسپار بويىنشا شەشەتىن بولامىز» - دەپ مالىمدەگەن.

بۇدان بولەك بۇگىن قوس ەلدىڭ پرەزيدەنتتەرى ستامبۇل قالاسىندا جالپى قۇنى 3,5 ميلليارد دوللاردى قۇرايتىن قۇجاتتارعا قول قوياتىن بولادى. شاۆكات ميرزيەەۆتىڭ تۇركياعا رەسمي ساپارى قازان ايىنىڭ 27-ءسى كۇنى اياقتالادى دەپ كۇتىلۋدە.

“The Qazaq Times”