شاياحمەتوۆا بانكتەرگە بەرىلەتىن قارجىنىڭ ءبىراز بولىگى جوعالۋى مۇمكىن ەكەنىن جوققا شىعارمايدى

حالىق بانكتىڭ باسقارما توراعاسى ءۇمىت شاياحمەتوۆا ۇلتتىق بانكتىڭ بانك سەكتورىنىڭ قارجىلىق تۇراقىلىعىنا قاتىستى باعدارلاماسىنا باعا بەردى. ول باعدارلاما بويىنشا بانكتەرگە بەرىلەتىن قارجىنىڭ ءبىراز بولىگى جوعالىپ كەتۋى مۇمكىن ەكەنىن جوققا شىعارعان جوق. 

"جالپى، بانك سەكتورىنا ارنالعان باعدارلاما قولايلى، مەن ونى وڭ باعالاپ، قولدايمىن. بىراق مۇنداعى ماسەلە بانكتەردىڭ باعدارلامانى قالاي قولداناتىنىندا بولىپ وتىر. بۇل تۋرالى مەنىڭ ناقتى سۇراقتارىم بار. كەيبىر قارجى ينستيتۋتتارىنا قولداۋ باعادارلاماسى كومەكتەسەتىنىنە سەنىمدىمىن. ويتكەنى ولارعا قورلارى مەن كاپيتالىن رەتتەۋ ءۇشىن قاراجات قاجەت.  ەگەر ول بانكتىڭ جاقسى بيزنەس مودەلى بولسا، قانداي ونىمدەردەن، كليەنتتەردەن تابىس تابۋعا بولاتىنىن تۇسىنسە، بۇل كومەك شىنىمەن پايدالى بولادى. الايدا بيزنەس مودەلدەرى جوق جانە قىزمەتى بويىنشا كەيبىر كەمشىلىكتەرى بار ويىنشىلار بولسا، وندا ولارعا كومەك كورسەتۋ پايداسىز. الداعى ۋاقىتتا قاراجات جوعالۋى مۇمكىن", - دەدى ول كەشە حالىق بانكتىڭ باس كەڭسەسىندە وتكەن ءباسپاسوز كونفەرەنتسياسىندا.

سونداي-اق، ءۇمىت شاياحمەتوۆا جۋرناليستەردىڭ "ۇلتتىق بانكتىڭ ءوز وكىلەتتىگىن ارتتىرۋى مۇمكىن ەكەنىن قالاي باعالايسىز، بۇل ورىندى ما؟" دەگەن سۇراعىنا: "بۇل ارينە، داۋلى ماسەلە. قازىرگى ۋاقىتتا ءالى تالقىلاۋلار بولىپ جاتقاندىقتان، الدىن الا پىكىر بىلدىرگىم كەلمەيدى. قازاقستان - بۇل سۋبەكتيۆيزمى تىم كوپ ءارى ءالى دە جەمقورلىق جويىلماعان مەملەكەت.  بەلگىلى ءبىر شارالاردى قولدانۋ، مىسالى پايىمداۋعا نەگىزدەپ ليتسەنزيالاردى بەرۋ - بۇل ءبىز ءۇشىن ءالى دە ۇلكەن تاۋەكەلدەرگە بارۋ", - دەپ جاۋاپ بەردى.

ايتا كەتەيىك، بۇدان بۇرىن ۇلتتىق بانك توراعاسى دانيار اقىشەۆ  بانك سەكتورىنىڭ قارجىلىق ورنىقتىلىعىن ارتتىرۋ باعدارلاماسىن ىسكە اسىرۋ بارىسى تۋرالى حابارلاپ، الداعى ۋاقىتتا 4 بانكتىڭ مەملەكەتتەن قارجىلاي كومەك الاتىنىنىن مالىمدەگەن.

“The Qazaq Times”