قىرعىزستان جوعارى كەڭەسىنە جاڭا سپيكەر تاعايىندالدى

قىرعىزستان جوعارى كەڭەسىنە جاڭا سپيكەر تاعايىندالدى –دەپ حابارلايدى kaktus media اقپارات كوزى.

بۇگىن تاڭەرتەڭ ءبىر جارىم جىل جوعارى كەڭەستە سپيكەر بولىپ وتىرعان چىنىباي تۇرسىنبەكوۆ ءوز ەركىمەن وتستاۆكاعا كەتەتىنىن مالىمدەگەن. ول ءوزىنىڭ بۇنداي شەشىمگە كەلۋىن ەلدەگى ساياسي جاعدايلاردىڭ ۋشىعىپ كەتۋىمەن بايلانىستىرعان. تۇرسىنبەكوۆ ءوزىنىڭ وتستاۆكاعا كەتەتىندىگىن ايتا سالىسىمەن جوعارى كەڭەستە دەپۋتاتتارى جاڭا سپيكەر سايلادى. قىرعىز دەپۋتاتتارىنىڭ بۇل جولعى تاڭداۋى «قىرعىزستان» فراكتسياسىنىڭ وكىلى داستان جۇمابەكوۆقا تۇسكەن. جۇمابەكوۆپەن قاتار سپيكەرلىككە «ءبىر بول» فراكتسياسىنىڭ مۇشەسى اسقاربەك شوديەۆ پەن "قىرعىزستان سوتسيال-دەموكاراتيالىق پارتياسىنىڭ" كوشباسشىسى يسا ومىرقۇلوۆ ۇسىنىلعان. الايدا سوڭعى ساتتە شاديەۆ پەن ومىرقۇلوۆ سپيكەر بولۋدان باس تارتقان. بىراق بۇعان دەيىن ءباسپاسوز بەتتەرىندە المازبەك اتامباەۆتىڭ جوعارى كەڭەس سپيكەرى ەتىپ داستان جۇمابەكوۆتى تاعايىندايتىنى جايىندا ايتىلعان.

ەستەرىڭىزگە سالايىق، بۇگىن تاڭەرتەڭ قىرعىز پارلامەنتىنىڭ سپيكەرى چىنىباي تۇرسىنبەكوۆ ءوز ەركىمەن قىزمەتىنەن كەتكەن بولاتىن. قىرعىزستاندىق ساراپشىلار تۇرسىنبەكوۆتىڭ وتستاۆكاعا كەتۋىن پرەزيدەنت سايلاۋى قارساڭىندا سوورونباي جەەنبەكوۆقا قاتىستى ايتقان پىكىرلەرىمەن بايلانىستىرعان. ولاردىڭ پىكىرىنشە، چىنىباي تۇرسىنبەكوۆ ءوز ەركىمەن ەمەس المازبەك اتامباەۆتىڭ نۇسقاۋى بويىنشا وتستاۆكاعا كەتكەن.

“The Qazaq Times”