فوتو: The Local Spain

يسپانيا كاتالونيا باسشىسى كارلەس پۋدجەمونت پەن ونىڭ سەرىكتەستەرىن قىزمەتىنەن بوساتىپ، جاڭادان سايلاۋ وتكىزەدى. وسىدان بۇرىن قولدانىلماعان كونستيتۋتسيا تارماعى ءىس جۇزىندە قولعا الىنىپ، ورتالىق بيلىك ءوزىن-ءوزى باسقارۋ قۇقىعىنا يە اۆتونوميالىق ايماقتىڭ بيلىگىن ءوز قولىنا الادى. يسپانيانىڭ الداعى اپتاعا جوسپارى مەن جەرگىلىكتى حالىقتىڭ قارسىلىق شارالارى تۋرالى APF اقپاراتتىق اگەنتتىگى جازدى. 

بۇگىن كاتالونيا پارلامەنتىنە مۇشە پارتيالار كلەسى قادامداردى تالقىلاۋ ءۇشىن جينالادى. كارلەس پۋدجەمونت يسپانيانىڭ پرەمەر-ءمينيسترى ماريانا راحويدىڭ شەشىمىن "كاتالون حالقىنا قارسى جاسالعان شابۋىل" دەپ قابىلدادى. ول يسپانيانىڭ بيلىكتى تۇبەگەيلى اۋىستىرۋ تالپىنىسى فرەنسيسكو فرانكونىڭ ديكتاتورلىعىنان اسىپ تۇسكەنىن ايتادى. يسپانيانىڭ ىلگەرىدەگى باسشىلارىنىڭ ءبىرى فرەنسيسكو فرانكو 1939-1975 جىلدار ارالىعىندا كاتالون تىلىنە مۇلدە تىيىم سالىپ تاستاعان بولاتىن. سەنبى كۇنى كاتالونيا بيلىگىن شەكتەۋ تۋرالى حابارعا نارازى جارتى ميلليونعا جۋىق حالىق قالا كوشەلەرىنە شىقتى.

قوعام بەلسەندىلەرى سەپاراتيستىك قوزعالىستىڭ جەڭىسكە جەتۋى ءۇشىن بىرنەشە جولدار بارىن ايتادى. سولاردىڭ ءبىرى - ازاماتتاردىڭ جاڭا بيلىككە مويىنسۇنباۋى، بۇيرىقتارىن ورىنداۋدان تۇبەگەيلى باس تارتىپ، مەكەمەلەرگە كىرۋىنە توسقاۋىل بولۋى. ۆۆس ءجۋرناليستىنىڭ "كارلەس پۋدجەمونت ءوز قىزمەتىنە ورالسا، تۇتقىندالادى ما؟" دەگەن ساۋالىنا يسپانيانىڭ بيلىك وكىلدەرى "ەشكىمدى تۇتقىندامايمىز. بىراق كارلەس پۋدجەمونت پەن ونىڭ سەرىكتەستەرى جەرگىلىكتى حالىققا بۇيرىق بەرۋىن جالعاستىراتىن بولسا، ولار كاتالون حالقىنا ءوز ويلارىن تاڭىپ جۇرگەن سەپاراتيستىك توپ دەپ تانىلادى" دەپ ءتۇسىندىردى.

كاتالونياداعى رەفەرەندۋم جەرگىلىكتى حالىقتى ەكىگە ءبولدى. اۆتونوميا بولىپ قالۋدى ءجون كورەتىندەر مەن يسپانيادان ىرگەسىن اۋلاق سالۋدى قالايتىندار اراسىنداعى داۋدىڭ نەگىزگى تاقىرىبى - كاتالونيانىڭ ەكونوميكالىق مۇمكىندىكتەرىنىڭ جوعارى بولا تۇرا، ءوز تابىسىن ءوزى تولىق پايدالانا الماي، وزگە وڭىرلەردىڭ قازىناسىن تولتىرۋعا كومەكتەسەتىندىگى. تاۋەلسىزدىك جاقتاۋشىلارى مۇنى ادىلەتسىزدىك دەپ تاپسا، يسپانيا بىرلىگىن اڭسايتىندار "كاتالونيا وزگە ايماقتاردان مىقتى ءارى تابىسى كوپ بولعانى ءۇشىن دە ونىڭ ارتىق تولەگەندىگىنىڭ ابەستىگى جوق دەپ وتىر".

كاتالونياداعى رەفەرەندۋمعا 7,5 ملن حالىقتىڭ 43 پايىزى قاتىسىپ، قالعاندارى قالىس قالعان بولاتىن.

“The Qazaq Times”