«ER JANIBEK CUP» حالىقارالىق ءتۋرنيرىنىڭ جالاۋى. فوتو: QT

الماتىدا «ەر جانىبەك» حالىقارالىق قوعامدىق قورىنىڭ ۇيىمداستىرۋىمەن شاعىن فۋتبولدان ءداستۇرلى «ER JANIBEK CUP-2017» حالىقارالىق ءتۋرنيرى باستالدى. بيىلعى كۋبوك بەلگىلى عالىم، فيلولوگيا عىلىمدارىنىڭ دوكتورى، پروفەسسور تۇرسىنبەك كاكىشەۆتىڭ 90 جىلدىق مەرەيتويىنا ارنالىپ وتىر.

ءتۋرنيردىڭ اشىلۋ سالتاناتىنا دۇنيە ءجۇزى قازاقتارى قاۋىمداستىعى مادەنيەت ورتالىعىنىڭ جەتەكشىسى ءسۇلتانالى بالعاباەۆ ءسوز الىپ، جارىستىڭ اشىلۋىمەن قۇتتىقتادى.

دۇنيە ءجۇزى قازاقتارى قاۋىمداستىعى مادەنيەت ورتالىعىنىڭ جەتەكشىسى ءسۇلتانالى بالعاباەۆ. فوتو: QT

"ەڭ الدىمەن بۇگىنگى قازاق حالقى ءۇشىن ۇلكەن وقيعا بولىپ سانالاتىن بۇگىنگى ۇلكەن جارىستىڭ باستالۋىمەن قۇتتىقتايمىن. مەن مۇندا دۇنيە ءجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆتىڭ تاپسىرماسىمەن كەلىپ، سول كىسىنىڭ سالەمىن جەتكىزىپ وتىرمىن. وسى شارانى ۇيىمداستىرىپ وتىرعان "ەر جانىبەك" قورىنا العىس ايتامىن. مۇنداي شارانى ۇيىمداستىرۋ دا وڭاي ەمەس. قاۋىمداستىق الماتىدان استاناعا كوشۋىنە بايلانىستى بۇعان تولىق قاتىسا الماي قالدى. ال ەندىگى جىلى مۇنداي جارىستار جوعارى دەڭگەيدە وتەدى. قاۋىمداستىق بۇعان بەلسەنە ارالاساتىنىنا سەنىم بىلدىرەمىن", - دەدى سۇلتانالى بالعاباەۆ.

قوعام جانە مەملەكەت قايراتكەرى بالتاش تۇرسىنباەۆ تا ءتۋرنيردىڭ اشىلۋىمەن قۇتتىقتادى.

قوعام جانە مەملەكەت قايراتكەرى بالتاش تۇرسىنباەۆ. فوتو: QT

ء"بىز مەملەكەت رەتىندە، حالىق رەتىندە ەسىمىزدى جيناپ، ءبىر ءبىرىمىزدى ىزدەپ تاۋىپ، تانىسىپ، ءوز ۇلتىمىزدىڭ ءداستۇرىن قوسىپ جاتىرمىز. قور بىرنەشە كۇننەن بەرى قولدارىنان كەلگەن ەڭبەكتەرىن جاساپ، بەلسەندى كىرىسىپ، بۇگىن سىزدەردىڭ باستارىڭىزدى قوسىپ، وسىنداي سايىس وتكىزىپ جاتىر. مۇنداي سايىستار ءجيى بولىپ تۇرسىن. باسىمىز قوسىلا بەرسىن", - دەپ تىلەك ءبىلدىردى بالتاش تۇرسىنباەۆ.

سونداي-اق، اكادەميك، "ەر جانىبەك" حالىقارالىق قورىنىڭ قۇرمەتتى توراعاسى ماقسۇت تەمىرباي ءسوز سويلەدى.

ەر جانىبەك" حالىقارالىق قورىنىڭ قۇرمەتتى توراعاسى ماقسۇت تەمىرباي. فوتو: QT

"بۇگىنگى كوپشىلىككە اراسىنداعى تۋرنير تۇرسىنبەك اعامىزعا ارنالىپ وتىر. تۇرسىنبەك اعا ءومىر بويى ءوزىنىڭ ءبىلىمىن قازاق ەلىنە ارناپ، كوپ ۇلەسىن قوستى. اعامىز عىلىمي جاعىنان بولسىن، ادامگەرشىلىك جاعىنان بولسىن بىزگە ۇلگى بولىپ كەلەدى. ول كىسى سونداي ۇلكەن ىستەردى جاساپ، وسىنداي ىستەردىڭ سارا جولىن كورسەتە ءبىلدى", - دەدى ماقسۇت تەمىرباي.

قازۇۋ فيلولوگيا جانە الەم تىلدەرى فاكۋلتەتىنىڭ دەكانى، پروفەسسور ءومىرحان ءابديمانۇلى دا ءتۋرنيردىڭ اشىلۋ سالتاناتىندا كوماندالارعا جەڭىس تىلەدى.

قازۇۋ فيلولوگيا جانە الەم تىلدەرى فاكۋلتەتىنىڭ دەكانى، پروفەسسور ءومىرحان ءابديمانۇلى. فوتو: QT

"بۇگىنگى تۋرنير قازاقتىڭ ۇلى قايراتكەرى، عۇلاما عالىمى، ۇلاعاتتى ۇستازى، وسى قازاق ۇلتتىق ۋنيۆەرسيتەتىنە 50 جىل سانالى عۇمىرىن ارناعان، اتاقتى قازاق، ادال قازاق تۇرسىنبەك كاكىشۇلىنا ارنالىپ وتىر.  90 جىلدىعى. تۇرسەكەڭنىڭ ارمانى ەدى "مەن 90-نان اسامىن" دەيتىن. اتتەڭ، 90-عا ءسال عانا جەتپەي قالدى. بىراق بۇگىنگى ۇرپاعى 90 جىلدىعىن 90 عاسىرعا اسىراتىنداي وسىنداي شارالاردى ۇيىمداستىرىپ جاتىر. ال بۇگىنگى وسى تۋرنيرگە كەلگەن قازاق جىگىتتەرى، شەتەلدەن كەلگەن ازاماتتارعا، بارلىعىڭىزعا جەڭىس تىلەيمىن", - دەدى ءومىرحان ءابديمانۇلى.

ءتۋرنيردىڭ اشىلۋىندا ءسوز سويلەگەن «ەر جانىبەك» حالىقارالىق قوعامدىق قورىنىڭ پرەزيدەنتى جەڭىس تۇركيا كەلگەن قوناقتارعا العىسىن ءبىلدىرىپ، قاتىسۋشى كوماندالارعا ساتتىلىك تىلەدى.

«ەر جانىبەك» حالىقارالىق قوعامدىق قورىنىڭ پرەزيدەنتى جەڭىس تۇركيا. فوتو: QT

"بيىل ءىىى كەزەكتى وتكىزىلىپ وتىرعان «ER JANIBEK CUP-2017» حالىقارالىق تۋرنيرىنە كەلگەندەرىڭىز ءۇشىن العىس ايتامىن. دۇنيەنىڭ تۇپكىر-تۇپكىرىنەن كەلىپ، جينالىپ، وسىنداي دوداعا قاتىسىپ وتىرعان بارلىق كومانداعا جەڭىس تىلەيمىن", - دەدى جەڭىس تۇركيا.

سونداي-اق، جارىسقا كەلگەن قانداستارىمىز وسىنداي ءىس-شارالاردىڭ  ۇيىمداستىرىلعانىنا العىس ءبىلدىردى.

"Parij Kazakh sport" فۋتبول كومانداسىنىڭ جەتەكشىسى تابارىك دوولۋ. فوتو: QT

"فرانتسيادان اتامەكەنىمىزگە بارامىز دەگەن قازاق جىگىتتەرى كوپ.  ءبىزدىڭ ماقساتىمىز - الەمدەگى قازاق جاستارىنا ءوز مادەنيەتىن، تاريحىن، ءداستۇرىن تانىتۋ. قازاق ەلىنىڭ رۋحاني جاڭعىرۋىنا ۇلەس قوسقان جانە "شەتەلدەگى قانداستارىمىز" دەپ بىزگە كوز قىرىن سالىپ جۇرگەن وسىنداي قوعامدىق قورلارعا، ەلىمىزگە العىس بىلدىرەمىز", - دەدى فرانتسيادان كەلگەن "Parij Kazakh sport" فۋتبول كومانداسىنىڭ جەتەكشىسى تابارىك دوولۋ.

«ەر جانىبەك» حالىقارالىق قوعامدىق قورىنىڭ «ER JANIBEK CUP» ءتۋرنيرى  - بيىل ءىىى رەت ءوتىپ وتىر. قازاقستاننىڭ تۇپكىر-تۇپكىرىنەن جانە يران، فرانتسيا، قىتاي، رەسەي، موڭعوليا ەلىنەن كەلگەن 20 كوماندا باق سىناپ جاتقان  جارىستىڭ جۇلدە قورى - 2 ميلليون تەڭگەنى قۇرايدى.

فرانتسيادان كەلگەن "Parij Kazakh sport" فۋتبول كومانداسى. فوتو: QT

تۋرنيرگە قاتىسۋعا كەلگەن كوماندالار مىنالار: ""قازاق ستامبۇل" (تۇركيا), امىر" (رەسەي، ساراتوۆ قالاسى), ء"ۇشتاس" (قىتاي، بەيجىڭ) "Parij Kazakh sport" (فرانتسيا، پاريج), "نامىس" (رەسەي، ومبى قالاسى), "بايولكە" (موڭعوليا), "الاش" (قىرعىزستان), "داستان" (يران), "NFC Kazakhstan پاۆلودار" (قازاقستان، پاۆلودار), "تايماس" (قازاقستان، سولتۇستىك قازاقستان وبلىسى), "نامىس" (قازاقستان، تۇركىستان قالاسى), "جەرۇيىق" (قازاقستان، تالدىقورعان قالاسى) جانە الماتى قالاسىنان كەلگەن "بىرلىك-كەرۋەن", "ساۋىر", "ەرەنتاۋ", "ۇشقوڭىر", "بەسقالا", "بارىس", "الاتاۋ", "عافۋر" كوماندالارى.

“The Qazaq Times”