فوتو: Reuters

ءسوماليدىڭ استاناسى موگاديشو قالاسىندا بولعان جارىلىستان 230 بەيبىت تۇرعىن مەرت بولدى. ەل استاناسىنىڭ حالىق كوپ جينالاتىن بولىگىندە، قوناق ءۇيدىڭ الدىندا كۇلى كوككە ۇشقان جارىلعىش زاتتار تولى جۇك كولىگى تاعى جۇزدەگەن ادامنىڭ جارالانۋىنا سەبەپكەر بولدى. بۇل تۋرالى ۆۆس اقپاراتتىق اگەنتتىگى جازدى. 

بۇل - سوماليدە ءال-شااباب يسلامدىق توبى 2007 جىلى  كوتەرىلىس باستاعالى بەرى بولعان ەڭ ۇلكەن تەررورلىق اكت. اتالعان توپتىڭ نەگىزگى نىسانى ادەتتە موگاديشو قالاسى بولاتىنى تۋرالى فاكتىدەن بولەك، تەرراكتىنى موينىنا العان ايقىن دالەلدەمە مەن مالىمدەمەلەر بولعان جوق.

سومالي پرەزيدەنتى مۇحاممەد ابدۋلاحي مۇحاممەد قاندى وقيعاعا بايلانىستى ەلدە ءۇش كۇندىك ازا تۇتۋ ءراسىمى جاريالاناتىنىن جەتكىزدى.

جەرگىلىكتى پوليتسيا قىزمەتكەرى يبراحيم مۇحاممەد APF اقپاراتتىق اگەنتتىگىنە بەرگەن سۇحباتىندا قازا تاپقاندار سانى تاعى دا ارتۋى مۇمكىن ەكەنىن ايتقان. ونىڭ ۇسىنعان اقپاراتى بويىنشا، 300-گە جۋىق ادام جاراقات العان، ولاردىڭ اراسىندا جاراقاتى اۋىر ازاماتتار كوپ. بۇل پىكىرمەن جەرگىلىكتى اۋرۋحانا دارىگەرى مۇحاممەد يۋسۋف حاسان دا كەلىسەدى. ول ءوزى قابىلداعان 72 ادامنىڭ 25-ءى اۋىر حالدە ەكەنىن ايتقان.

جارىلىستىڭ كۋاگەرى بولعان مۇحيددين ءالي: "بۇل مەن كورگەن ەڭ ۇلكەن جارىلىس. ول اينالاداعىنىڭ ءبارىن ءاپ-ساتتە جوق قىلدى", - دەدى.

اقش-تىڭ سوماليدەگى وكىلى مۇنداي جارىلىستاردىڭ بولۋى وڭىردە امەريكانىڭ تەرروريزمگە قارسى كۇرەسكە قولداۋ كورسەتۋى قاجەتتىلىگىن تاعى دا دالەلدەي تۇسەدى دەسە، ۇلىبريتانيانىڭ سىرتقى ىستەر ءمينيسترى بوريس دجونسون قارا جامىلعان جانۇيالارعا كوڭىل ايتىپ، قايعىعا ورتاقتاساتىنىن ءبىلدىردى.

“The Qazaq Times”