فوتو: ۆۆس

امەريكالىق ازامات، 84 جاستاعى ءدىني قىزمەتكەر Jerry Hammond اقش-تىڭ ءوز ازاماتتارىنا سولتۇستىك كورەياعا بارۋعا سالعان تىيىمى ونىڭ كەزەكتى ساپارىنا كەدەرگى بولا المايتىندىعىن مالىمدەدى. 1995 جىلدان بەرى سولتۇستىك كورەياعا گۋمانيتارلىق ميسسيامەن 54 رەت بارعان ازامات تۋبەركۋلەز دەرتىنە شالدىققان جانداردى ەمدەۋمەن اينالىسادى. وسى جولى سانكتسياعا قاراماستان، قاراشا ايىندا كحدر مەملەكەتىنە تاعى دا بەت تۇزەۋگە بەل بايلاعان ول، امەريكا پاسپورتىن تارتىپ السا دا، ءوز ويىنان باس تارتپايتىنىن ايتادى. بۇل تۋرالى ۆۆس اقپاراتتىق اگەنتتىگى جازدى. 

فوتو: ۆۆس

اقش-تىڭ شىلدە ايىندا جاريالاعان امەريكالىقتاردىڭ سولتۇستىك كورەياعا بارۋىنا شەكتەۋ قوياتىن سانكتسيالارى اعىمداعى جىلدىڭ 1 قىركۇيەگىنەن باستاپ كۇشىنە ەندى. قازىر وڭتۇستىك كورەيادا تۇرىپ جاتقان Jerry Hammond امەريكا ۇكىمەتىنە ءوزىنىڭ الداعى ساپارى تۋرالى ەسكەرتۋ حات جولداعان. بىراق "يا" نە "جوق" دەگەن ناقتى جاۋاپ الا الماعان ءدىني قىزمەتكەر اقش ۇكىمەتىنىڭ ۇنسىزدىگىن كەلىسكەندەرىنە بالاعانىن ايتادى. ۆۆس قىزمەتكەرلەرىنىڭ رەسمي سۇراۋىنا اقش-تىڭ مەملەكەتتىك دەپارتامەنتى: "امەريكالىق ازامات ءوز تولقۇجاتىن دۇرىس پايدالانباعانى ءۇشىن ودان ايىرىلۋى مۇمكىن. سونداي-اق قىلمىستىق جاۋاپكەرشىلىككە تارتىلۋى دا عاجاپ ەمەس", - بىلاي دەپ جاۋاپ بەرگەن.

Jerry Hammond ءار جىلى سولتۇستىك كورەياعا مامىر جانە قاراشا ايلارىنىڭ العاشقى ءۇش اپتاسىندا بارادى. ونىڭ نەگىزگى ماقساتى - ناۋقاس ادامنىڭ ءومىرىن ساقتاپ قالۋ. سولتۇستىك كورەيانىڭ ءتورت وڭىرىنە دارىلىك پرەپاراتتار جەتكىزەتىن قاريا Eugene Bell Foundation قورىنان قارجىلاي قولداۋ العان. تۋبەركۋلەزبەن اۋىراتىن ادامعا 18 ايدا 5 مىڭ دوللارعا جۋىق اقشا جۇمسالاتىنىن ايتقان ءدىني قىزمەتكەر مۇنداي شىعىنداردى دۇنيەجۇزىلىك دەنساۋلىق ساقتاۋ ۇيىمى كوتەرە المايدى دەيدى. وسىنداي جەكە قوردىڭ قولداۋىنا يە بولىپ وتىرعان ول، ۆيزالىق كەدەرگىلەر بولسا، قولدا بار تەگىن مۇمكىندىكتەردى مۇقتاج جاندارعا جەتكىزە الماي قالۋدان قورقادى.

“The Qazaq Times”