فوتو: kapital.kz

«Bank RBK» اق وزىنىڭ قارجىلىق تۇراقتىلىعىن نىعايتۋعا باعىتتالعان شارالار كەشەنىن ازىرلەپ جاتىر. بۇل تۋرالى بانكتىڭ ءباسپاسوز قىزمەتى حابارلادى. 

قارجى ينستيتۋتىنىڭ مالىمەتىنشە، شارالار "بانكتىڭ قارجىلىق تۇراقتىلىعىنا بايلانىستى نارىقتاعى الىپ قاشپا اڭگىمەلەردى نازارعا الا وتىرىپ" جاسالىپ جاتىر.

"اتالعان شارالار كەشەنىنە قارجى ينستيتۋتىن كاپيتالداندىرۋ، قوسىمشا وتىمدىلىكتى قامتاماسىز ەتۋ، بيزنەس-مودەلدى جەتىلدىرۋ جانە پروبلەمالى قارىزدارمەن جۇمىس ىستەۋ كىرەدى. بانك اكتسيونەرلەرىنىڭ ءبىرى ۆلاديمير كيم ءىس-شارالار كەشەنىن ازىرلەۋ ءۇشىن وزگە اكتسيونەرلەرمەن، قر ۇلتتىق بانكىمەن جانە قازاقستان ۇكىمەتىمەن كەلىسسوزدەرگە باستاماشىلىق ەتتى. سونداي-اق مەملەكەت پەن جەكە بيزنەستىڭ ىنتىماقتاستىعى اياسىندا بانكتى كاپيتالداندىرۋ شارتتارى تالقىلانۋدا", - دەلىنگەن ءباسپاسوز حابارلاماسىندا.

بانكتىڭ مالىمەتىنشە، 2017 جىلدىڭ 1 قىركۇيەگىندەگى جاعداي بويىنشا قارجى ينستيتۋتىنىڭ اكتيۆتەرى 1 017,3 ملرد تەڭگەنى، نەسيەلىك پورتفەل – 723,0 ملرد تەڭگەنى، كليەنت قاراجاتى – 594,5 ملرد تەڭگەنى قۇرادى، ونىڭ ىشىندە جەكە تۇلعالاردىڭ سالىمدارى – 206,7 ملرد تەڭگە. بانكتىڭ وزىندىك كاپيتالى 96,9 ملرد تەڭگەنى، جارعىلىق كاپيتالى - 64,4 ملرد تەڭگەنى قۇرادى. بانكتىڭ 2017 جىلعى 8 ايداعى تابىسى - 2,5 ملرد تەڭگە.

ايتا كەتەيىك، بۇدان بۇرىن ۆلاديمير كيم ۇلتتىق بانكتىڭ ساۋىقتىرۋ باعدارلاماسىنا قاتىسۋ ءۇشىن «Bank RBK» اق-نى كاپيتالداندىرۋعا 20 مرلد تەڭگە جۇمسايتىنى تۋرالى حابارلانعان. سونداي-اق، «Bank RBK» اق مەن «Qazaq Banki» اق اكتسيونەرلەرىنىڭ قارجى ينستيتۋتتارىن بىرىكتىرۋ تۋرالى كەلىسسوز جۇرگىزگەنى ءمالىم. ەگەر ەكى بانك بىرىگەتىن بولسا قارجى ۇيىمى Bank RBK دەپ اتالۋى مۇمكىن.

“The Qazaq Times”