ساۋد ارابياسى كورولىنىڭ سارايىنا شابۋىل جاسالدى

ساۋد ارابياسى كورولىنىڭ سارايىنا شابۋىل جاسالدى – دەپ حابارلايدى Reuters اقپارات اگەنتتىگى.

اگەنتتىكتىڭ مالىمەتىنشە، دجيددا قالاسىندا ورنالاسقان ساۋد ارابياسىنىڭ كورولى سالمان يبن ابدۋل-ازيز ءال-ساۋد سارايىنا «كالاشنيكوۆ» اۆتوماتىمەن قارۋلانعان ادام شابۋىل جاساعان. سالدارىنان ەكى كۇزەتشى كوز جۇمىپ، ۇشەۋى جاراقات العان. كورول سارايىنا وق جاۋدىرعان 28 جاستاعى مانسۋر بين حاسسان ءال-امەريدىڭ ءوزى دە وقيعا ورىنىندا وققا ۇشقان.

جەرگىلىكتى قۇقىق قورعاۋ ورگاندارىنىڭ مالىمەتىنشە، بۇعان دەيىن ءال-امەري ەشقانداي ەكسترەميستىك ۇيىمداردىڭ قاتارىندا بولماعان. بىراق ونىڭ مۇنداي قادامعا نە ءۇشىن بارعانى ازىرگە بەلگىسىز. تەكسەرۋ بارىسىندا ونىڭ دەنەسىنەن قولدان جاسالعان ەكى جارىلعىش زات پەن كالاشنيكوۆ اۆتوماتىنىڭ وق دارىلەرى تابىلعان.

ەستەرىڭىزگە سالايىق، ساۋد ارابياسى كورولى بۇعان دەيىن قازان ايىنىڭ 5-7 كۇندەرى ارالىعىندا تۇڭعىش رەت رەسەيگە ءىس-ساپارمەن بارعان. ول وندا رەسەي پرەزيدەنتى ۆلاديمير پۋتينمەن كەزدەسكەن. وسىدان كەيىن باق بەتتەرىندە ساۋد ارابياسى رەسەيدەن س-400 اۋە قورعانىسى جۇيەسىن ساتىپ الۋى مۇمكىن دەگەن اقپارات تاراعان بولاتىن.

“The Qazaq Times”