قازاقستان ەكونوميكاسى: ەڭ ماڭىزدى جاڭالىقتارعا شولۋ

اپتا سايىن ەلىمىزدە، الەمدە ءتۇرلى حالىقارالىق، ساياسي، ەكونوميكالىق ماڭىزدى جاڭالىقتار بولادى. ونىڭ ءبىرى ءبىرىن وقىساق، ەندى ءبىرى نازاردان تىس قالىپ جاتادى. ەندەشە The Qazaq Times وقىرماندارى ءۇشىن 2-7 قازان ارالىعىندا بولعان ەڭ ماڭىزدى ەكونوميكا جاڭالىقتارىنا شولۋ جاسايدى.

رەسەي ەكسپورتتالاتىن مۇنايعا باج سالىعىن كوتەردى - قازاقستاندا بەنزين قىمباتتادى

اپتانىڭ باسىندا قازاقستاندا بەنزيننىڭ قىمباتتاۋى باستى جاڭالىق بولدى. 1 قازاننان باستاپ رەسەي ەكسپورتتالاتىن مۇنايعا سالىناتىن باج سالىعىن 3,8  دوللارعا كوتەردى. وسىلايشا قىركۇيەك ايىنداعى ەسەپ بويىنشا مۇناي ەكسپورتىنىڭ سالىعى تونناسىنا 84,1 دوللار بولعان ەدى، ەندى 87,9 دوللار بولاتىن بولدى تۇتقىرلىعى جوعارى مۇنايعا باج سالىعى 1 قازاننان باستاپ 12,9 دوللاردان 13,6 دوللارعا دەيىن قىمباتتايتىن بولدى. ال وسىدان كەيىن سايكەستىك پە، قازاقستاندا بەنزين باعاسى تاعى كوتەرىلىپ، ەڭ كوپ پايدالانىلاتىن اي 92 ماركالى جانارماي قۇنى 151 تەڭگەگە دەيىن جەتتى.

قانات بوزىمباەۆ بەنزين باعاسىن تومەندەتۋگە قاتىستى ۋادە بەرە المادى

ال وسىدان كەيىن ءدال ءبىر كۇننەن سوڭ قر ەنەرگەتيكا ءمينيسترى قانات بوزىمباەۆ ۇكىمەت وتىرىسىندا ەسەپ بەردى. الايدا ول  قر پرەمەر-ءمينيسترى باقىتجان ساعىنتاەۆتىڭ بەنزينگە قاتىستى "باعا تومەندەي مە؟" دەگەن سۇراعىنا مينيستر "باعا تۇراقتالادى" دەپ عانا جاۋاپ بەردى. جاۋاپ بەردى.

قازاقستاندىقتاردىڭ جىلۋ ءۇشىن قارىزى 10 ملرد تەڭگەدەن اسادى 

قر ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ باسشىسى سۇڭعات ەسىمحانوۆ بولسا قازاقستاندىقتاردىڭ ەنەرگەتيكا كاسىپورىندارى الدىنداعى قارىزى 10 ملرد تەڭگەدەن اساتىنىن مالىمدەدى.

"حالىق ەنەرگەتيكا كاسىپورىندارىنا 10 ملرد تەڭگەدەن اسا قارىز. قارىزدىڭ كوپ بولىگى، ياعني 3 ملرد تەڭگە الماتى قالاسىنا تيەسىلى. وڭتۇستىك قازاقستان وبلىسى بويىنشا دا قارىز 3 ملرد تەڭگە شاماسىندا. قالعان وبلىستاردا قارىز ءبىر ايلىق كولەمدە قالىپ وتىر", - دەدى ەسىمحانوۆ ورتالىق كوممۋنيكاتسيالار قىزمەتىندە وتكەن بريفينگتە. ونىڭ ايتۋىنشا، قارىز كولەمى جىلۋ بەرۋ ماۋسىمى باستالار كەزدە ۇنەمى وسىنداي دەڭگەيدە بولادى ەكەن.

ءبىر ايدا جۇمىسسىزدار سانى 49,1 پايىزعا وسكەن

2017 جىلدىڭ تامىز ايىنىڭ قورىتىندىسى بويىنشا قازاقستانداعى جۇمىسسىزدار سانىنىڭ ۇلعايعانى بەلگىلى بولدى. قازاقستاننىڭ جۇمىسپەن قامتۋ ورىندارىندا تىركەلگەن جۇمىسسىزدار سانى 143,8 مىڭ ادامدى قۇراعان.  وسىلايشا بۇل كورسەتكىش 2017 جىلدىڭ شىلدە ايىنداعى كورسەتكىشپەن سالىستىرعاندا (96,4 مىڭ ادام) 49,1%-عا ارتقان. سونداي-اق جۇمىسسىزدار سانى قاڭتار ايىنان بەرى (55,1 مىڭ ادام) 2,6 ەسەگە وسكەن.

دوللار كۋرسى ءبىر جىلداعى ەڭ جوعارعى كورسەتكىشكە جەتتى

وسى اپتپدا تەك بەنزين باعاسى عانا قىمباتتاپ قانا قويماي، تەڭگەگە قاتىستى دوللار كۋرسى دا جوعارىلادى. 5 قازان كۇنى قازاقستان قور بيرجاسىندا بولعان تاڭعى سەسسيا كەزىندە ۇلتتىق ۆاليۋتانىڭ دوللارعا قاتىستى باعامى 345 تەڭگەگە دەيىن السىرەدى.  ساۋدا كولەمى 12,8 ملن دوللارعا دەيىن جەتتى. سەسسيا كەزىندە دوللار كۋرسى  345,37 تەڭگەگە دەيىن قىمباتتاپ، سەسسيانىڭ جابىلۋ كەزىندە دە وسى دەڭگەيىن ساقتادى. دوللاردىڭ مۇنداي ماكسيمۋم كورسەتكىشى وسى جىلى تىركەلمەگەن. سوڭعى رەت جوعارعى كورسەتكىش 2016 جىلدىڭ قاراشا ايىندا بولعان. وسىلايشا بۇل وسى جىلعى ەڭ ماكسيمۋم دەڭگەي بولدى.

قازاقستان جاڭارتىلاتىن ەنەرگيا كوزدەرىن دامىتۋ ءۇشىن قارىز الادى

جاسىل كليمات قورى (GCF) ەۋروپالىق قايتا قۇرۋ جانە دامۋ بانكىنىڭ (ەقدب) نەگىزدەمە باعدارلاماسى ارقىلى جاڭارتىلاتىن ەنەرگيا كوزدەرىنە قاتىستى جوبالاردى ىسكە اسىرۋ ءۇشىن قازاقستانعا 110 ملن دوللار كولەمىندە قارجى بەرەدى. GCF-ءتىڭ بۇل سالىمىنىڭ 106 ملن دوللارى جەڭىلدىكپەن قارجىلاندىرۋ بويىنشا، 4 ملن دوللارى گرانت تۇرىندە تەحنيكالىق كومەك كورسەتۋ ءۇشىن بەرىلمەك.

“The Qazaq Times”