تاجىكستان پرەزيدەنتى ەمومالي راحمون.

قازاننىڭ 5-ءسى كۇنى تاجىكستان پرەزيدەنتى ەمومالي راحمون 65 جاسقا تولدى. وسىعان بايلانىستى كۇنى بۇگىنگە دەيىن ەسىمى ەلگە تانىس ەمەس بولىپ كەلگەن جازۋشى لۋكمون قۇربونوۆ 5-ءشى قازاندى ەمومالي راحموننىڭ قۇرمەتىنە «ۇلت كۇنى»  دەپ اتاۋدى ۇسىندى.

قازان ايىنىڭ 4-ءى كۇنى تاجىكستان مەملەكەتتىك باسىلىمدارىنىڭ ءبىرى، «دجۋمۋريات» گازەتىندە لۋكمون قۇربونوۆ ەسىمدى جازۋشى ەمومالي راحمون تۋعان كۇنىن «ۇلت كۇنى» دەپ اتاۋدى ۇسىنعان. ول وندا: «جىل سايىن تاجىكستان حالقى ەلدە بەيبىتشىلىك پەن تۇراقتىلىق ورناتقان، ۇلت كوشباسشىسى ەمومالي راحمون تۋعان كۇنىن شىن جۇرەكپەن اتاپ وتەدى. بۇل كۇندى پرەزيدەنتىمىزدىڭ قۇرمەتىنە «ۇلت كۇنى» دەپ اتاساق ەشكىم قارسى بولماس. كەرىسىنشە، تاجىك حالقىنىڭ «ەڭبەكتەگەن بالاسىنان، ەڭكەيگەن قارتىنا دەيىن» قولدايدى دەپ ويلايمىن» - دەپ جازعان.

سوڭعى جىلدارى تاجىكستان مەملەكەتتىك تەلەارنالارى مەن گازەت، جۋرنالدارى ەل پرەزيدەنتى ەمومالي راحموندى ماقتاۋدا الدىلارىنا جان سالمايتىن بولعان. ەلدەگى بارلىق ارنا وزدەرىنىڭ جۇمىستارىن ەمومالي راحموندى ماقتاۋمەن باستاپ، ماقتاۋمەن اياقتايتىن بولعان. ءتىپتى مەملەكەتتىك باق وكىلدەرى 2016 جىلى ەمومالي راحمون وتباسىمەن بىرگە مەككەگە بارىپ كەلگەننەن كەيىن، ونىڭ ايەلىنە «تاجىكستان مۇسىلمان ايەلدەرىنىڭ كوشباسشىسى» اتاعىن بەرۋدى دە ۇسىنعان. بىراق بۇل جاعداي ءبىزدىڭ ەلگە دە تاڭسىق ەمەس. بىزدە حالىق بولىپ، جۇرت بولىپ جىل سايىن ەل پرەزيدەنتى نۇرسۇلتان نازارباەۆتىڭ تۋعان كۇنىمەن تۇسپا-تۇس كەلەتىن "استانا كۇنىن" تويلايمىز. ال جەلتوقساننىڭ ءبىرىن ارنايى "پرەزيدەنت كۇنى" دەپ زاڭ جۇزىندە بەكىتىپ قويعانبىز.

“The Qazaq Times”