ەۋروپارلامەنت.

ەۋروپارلامەنت كاتالونيادا وتكەن رەفەرەندۋمدى دا، وعان قارسى كۇش قولدانعان پوليتسيا ءىس-ارەكەتىن دە قاتاڭ سىنعا الدى – دەپ حابارلايدى نەمىس تولقىنى اقپارات اگەنتتىگى.  

قازان ايىنىڭ 4-ءى كۇنى ەۋروپارلامەنت دەپۋتاتتارى يسپانياداعى جاعدايلارعا بايلانىستى دەبات وتكىزدى. جيىندا ءسوز سويلەگەن بارلىق دەپۋتاتتار كاتالونيا رەفەرەندۋمىن ءبىر اۋىزدان زاڭسىز دەپ تانىعان. ال وعان قارسى كۇش قولدانعان رەسمي مادريد ءىس-ارەكەتىن قاتاڭ سىنعا العان. دەبات بارىسىندا ەۋروكوميسسيا توراعاسىنىڭ ورىنباسارى فرانس تيممەرمانس كاتالونيا مەن يسپانيانى كەلىسىمگە كەلۋگە شاقىرعان. ودان كەيىن ءسوز العان ەۋروپا حالىقتىق پارتياسىنىڭ وكىلى مانفرات ۆەبار: «ەگەر كاتالونيا يسپانيادان ءبولىنىپ شىعاتىن بولسا، وندا ول ەۋرووداقتان دا، ونىڭ ىشكى ساۋدا اينالىمىنان دا بولىنەدى» - دەگەن. ال ليبەرالدار فراكتسياسىنىڭ توراعاسى گي ۆەرحوفستادت قوس تاراپتى جاعدايدى ۋشىقتىرماۋعا شاقىرىپ، ولاي ەتپەگەن جاعدايدا يسپانيا قوعامى ەكىگە بولىنەتىندىگىن ەسكەرتكەن.

ەستەرىڭىزگە سالايىق، قازان ايىنىڭ 1-ءى كۇنى كاتالونيا يسپانيادان ءبولىنىپ شىعۋعا بايلانىستى رەفەرەندۋم وتكىزگەن بولاتىن. وعان ەل حالقىنىڭ 42 پايىزى قاتىسىپ، ونىڭ 90 پايىزى دەربەس ەل بولۋدى قولداپ داۋىس بەرگەن. بىراق يسپانيا بيلىگى مەن كورولى كاتالونيانىڭ بۇل ءىسىن ەلدىڭ تۇتاستىعىنا نۇقسان كەلتىرۋ دەپ مالىمدەپ، ايماق باسشىلىعىن زاڭ بويىنشا جازالايتىندىقتارىن ايتقان.

“The Qazaq Times”