دونالد ترامپتىڭ پۋەرتو-ريكوعا ساپارى ءساتسىز باستالدى

دونالد ترامپتىڭ ەكى اپتا بۇرىن داۋىلدان زارداپ شەككەن پۋەرتو-ريكوعا ساپارى ءساتسىز باستالدى. ارال تۇرعىندارىنىڭ كۇش-جىگەرىن ەرەكشە باعالاپ، قايعىلارىنا كوڭىل ايتىپ، جاندارىنا دەمەۋ بولار ءسوز ايتادى دەپ كۇتكەنمەن اقش پرەزيدەنتى ەل سەنىمىن اقتامادى. ۆۆس اقپاراتتىق اگەنتتىگى جاريالاعان دونالد ترامپ ساپارىنىڭ بارىسى تۋرالى ماقالادا ەلدەن ەرەك پىكىرىمەن ءبارىن قايران قالدىرىپ جۇرەتىن امەريكانىڭ مەملەكەت باسشىسى بۇل جولى دا كوپشىلىككە تالقىعا سالار تاقىرىپ تاۋىپ بەردى. 

دونالد ترامپتىڭ پۋەرتو-ريكونىڭ بيلىك وكىلدەرىنە ايتقان ءسوزى:

- كەز كەلگەن ءولىم جامان، بىراق سىزدەر كاترينا سياقتى اپاتتاردىڭ سالدارىنا كوز جۇگىرتىپ قاراساڭىزدار، مۇندا بولعان جاعدايدىڭ ونىمەن سالىستىرۋعا كەلمەيتىنىن اڭعاراسىزدار. تابيعاتتىڭ توسىن سىيىنان مىڭداعان ادامدار قازا تاپقان وڭىرلەر بار، ال سىزدەردە 16 نە 17 ءولىم عانا... 16 قۇرباندى مىڭ ادام شىعىنىنا قارسى قويىپ قاراڭىز. سىزدەر مەن بىزدەردىڭ ادامدارىمىز بىرلەسىپ ەڭبەك ەتىپ جاتقانىن، مۇنداعى جاعداي سونشالىقتى اۋىر ەمەستىگىن ماقتان تۇتۋىمىز كەرەك.

ۆۆس ءجۋرناليسى Chris Cilliza "قۇرباندار سانىنىڭ از بولۋى بارلىعى جاقسى ەكەندىگىن بىلدىرمەيتىنىن، داۋىلدان كەيىن اس-سۋ مەن العاشقى مەديتسينالىق كومەكتەن قاعىلىپ، جىلۋ مەن جارىقسىز قالعان ەلدىڭ الدىندا ايتىلۋى كەرەك سوزدەر مۇلدە باسقا بولۋى كەرەك ەدى" دەگەن باعا بەرەدى. ءجۋرناليستىڭ پىكىرىنشە، 16 ادامنىڭ جاقىندارىن جوعالتقان كەزدە سەزىنگەن قايعىسى 1000 ادامنىڭ جوقتاعانداردىڭ ازاسىنان جەڭىل ەمەس.

دونالد ترامپ امەريكا پۋەرتو-ريكو ءۇشىن كوپ نارسە جاساعانى، قىرۋار قارجى بولگەنى تۋرالى دەرەكتەردى دە تىلگە تيەك ەتىپ ءوتتى. بىراق وسى تۇستا ۆۆس ءتىلشىسى مەملەكەت باسشىسىنىڭ بۇل ارەكەتى بالاسىنا مەكتەپكە قاجەتتى قۇرالدار الىپ بەرىپ، كەيىننەن ونىسىن مىندەتسىنگەن اتا-اناعا ۇقسايتىنىن ايتادى.

“The Qazaq Times”