لاۆروۆ: رەسەي اسكەري-تەحنيكالىق كومەك سالاسىندا ورتالىق ازيا ەلدەرىنىڭ باستى سەرىكتەسى

رەسەي قاۋىپسىزدىك جانە اسكەري-تەحنيكالىق كومەك سالاسىندا ورتالىق ازيا ەلدەرىنىڭ باستى سەرىكتەسى – دەپ مالىمدەدى رف سىرتقى ىستەر ءمينيسترى سەرگەي لاۆروۆ.

سەرگەي لاۆروۆ «روسسيسكايا گازەتا» باسىلىمىنا جاريالاعان «روسسيا – تسەنترالنايا ازيا: پارتنەرستۆو، يسپىتاننوە ۆرەمەنەم» اتتى ماقالاسىندا: «رەسەي سوڭعى 25 جىلدا ورتالىق ازيا ەلدەرىنە مەملەكەتارالىق كەلىسىمدەردەن بولەك، ۇقشق (ودكب), شانحاي ىنتىماقتاستىق ۇيىمى، تمد اياسىندا اسكەري-تەحنيكالىق، تەرروريزممەن كۇرەس، قاۋىپسىزدىك سالالارى بويىنشا كومەك كورسەتىپ كەلەدى. قازىرگى تاڭدا يراك پەن سۇرياداعى سوعىستىڭ اياقتالۋى مەن اۋعانستانداعى تۇراقسىزدىقتىڭ جاڭا دەڭگەيگە كوتەرىلۋى ورتالىق ازياعا ۇلكەن قاۋىپ ءتوندىرىپ تۇر. وسى ارادا جوعارىدا اتالعان ۇيىمدار مەن رەسەي كومەگىنىڭ ورىنى ەرەكشە. ءبىز ورتالىق ازيا ەلدەرىنىڭ وسى ۋاقىتقا دەيىن ايماقتىڭ دامۋىنا قوسقان ۇلەستەرىن جوعارى باعالايمىز. ەۋرازيالىق ەكونوميكالىق وداق، رەسەي مەن ورتالىق ازيا ەلدەرى اراسىنداعى قارىم-قاتىناستىڭ جوعارى دەڭگەيدە ەكەندىگىنىڭ ايقىن دالەلى. قازاقستان مەن قىرعىزستان اتالمىش ۇيىمنىڭ تولىققاندى مۇشەسى. قازىر ەۋرازيالىق ەكونوميكالىق وداقتىڭ جالپى ىشكى ءونىمى 2,2 ترلن دوللاردى قۇرايدى. ەاەو بۇل جاي عانا وداق ەمەس، ول–182 ميلليون تۇتىنۋشى» - دەپ جازعان.

بۇدان بولەك سەرگەي لاۆروۆ رەسەيدىڭ وسى ۋاقىتقا دەيىن ورتالىق ازيا ەلدەرىنە 20 ملرد دوللار كولەمىندە ينۆەستيتسيا قۇيعاندىعى جايىندا، ايماقتا رەسەيلىك جانە بىرلەسكەن 7,5 مىڭ كاسىپورىن جۇمىس ىستەيتىندىگى جايىندا ايتقان. سەرگەي لاۆروۆ اتالمىش ماقالاسىندا ورتالىق ازيا ەلدەرىن ماقتاۋدان باسقا، ولاردىڭ رەسەيگە قانشا قارىز ەكەندىگىن دە ەسكەرتە كەتكەن. لاۆروۆ مىرزانىڭ سوزىنشە، قازىرگى تاڭدا قىرعىزستان رەسەيگە 488 ملن، وزبەكستان 856 ملن دوللار كولەمىندە قارىز. بۇل ءتىزىمنىڭ ىشىندە قازاقستان جوق.

“The Qazaq Times”