كاتالونيا رەفەرەندۋمى جەڭىسكە جەتتى

كاتالونيا پرەزيدەنتى كارلس پۋدجەمونت تاۋەلسىزدىك الۋ ماقساتىندا وتكىزىلگەن رەفەرەندۋم جەڭىسكە جەتكەنىن حابارلادى. رەسمي وكىلدىڭ سوزىنشە، ەندى تاۋەلسىزدىك تۋرالى دەكلاراتسيا قابىلدانباق. بۇل تۋرالى ۆۆس اقپاراتتىق اگەنتتىگى جازدى. 

كاتالونيا ازاماتتارىنىڭ 43,2 پايىزى قاتىسقان رەفەرەندۋمدا داۋىس بەرگەندەردىڭ 90 پايىزى تاۋەلسىزدىكتى قولدايتىندارىن بىلدىرگەن. يسپانيا بيلىگى ەل تۇتاستىعىن ساقتاپ قالۋ ءۇشىن قولىنان كەلگەنىنەن ايانبايتىنىن ايتقان مالىمدەمەسىنە بەرىكتىك تانىتتى. كەشە الەمدىك اقپارات قۇرالدارى كاتالوندىقتاردىڭ داۋىس بەرۋىنە توسقاۋىل جاساعىسى كەلگەن پوليتسيا قىزمەتكەرلەرىنىڭ كۇش قولدانۋ فاكتىلەرىن جارىسا جاريالادى. جەرگىلىكتى حالىق ءتارتىپ ساقشىلارىنىڭ سونشا قاتال بولاتىندىعىنا ءبىرىنشى رەت كۋا بولعاندارىن ايتادى.

كارلەس پۋدجەمونت كاتالوندىقتارعا جولداۋىندا سوڭعى كۇندەرى كورسەتىلگەن قىسىمعا قاراماستان، رەفەرەندۋمعا قاتىسقان حالقىنىڭ جەڭىسىن ەرەكشە اتاپ ءوتتى. ول رەفەرەندۋم ناتيجەلەرى كاتالونيانىڭ پارلامەنتىنە جولدانىپ، ايماقتىعىن دەربەستىگىن ايعاقتايتىن زاڭ قابىلداناتىنىن حابارلادى. كاتالونيا كوشباسشىسى: "ەۋرووداق ەندى ءۇنسىز وتىرا المايدى!", - دەدى.

پوليتسيا قىزمەتكەرلەرىنىڭ بىرلەسكەن كۇشىمەن جابىلعان داۋىس بەرۋ پۋنكتەرىنىڭ ناقتى سانى تۋرالى دەرەكتەر ەكىگە جارىلادى: كاتالونيا 2 مىڭ 300 داۋىس بەرۋ پۋنكتىنىڭ 319-ى جابىلدى دەسە، يسپانيا بۇل كورسەتكىشتى 92 دەپ وتىر.

يسپانيانىڭ پرەمەر-ءمينيسترى ماريانو راحوي كاتالونيادا بولعان جاعدايدى "دەموكراتيانى كەلەكەلەۋ" دەپ اتادى. ول كونستيتۋتسيانى بۇزعان ارەكەتتىڭ زاڭدىق كۇشى بولمايتىنىنا سەنىمدى. دەگەنمەن مىڭداعان كاتالوندىقتار ءوز ءانۇرانىن شىرقاپ، ءتول تۋلارىن جامىلىپ، الاڭعا جينالدى. كاتالونياداعى 7,5 ملن ازاماتتىڭ بارلىعى بىردەي ەگەمەندىكتى قولداماسا دا، حالىقتىڭ باسىم كوپشىلىگىنىڭ يسپانيادان ەنشىسىن الۋعا ۇمتىلىسى جوعارى ەكەنىن بايقالادى.

“The Qazaq Times”