يسپانيا تاۋەلسىزدىك رەفەرەندۋمدى بولدىرماۋ ءۇشىن بارسەلوناعا مىڭداعان پوليتسيا اتتاندىردى

يسپانيا ۇكىمەتى كاتالونيا ايماعىنا مىڭداعان قوسىمشا پوليتسيا قىزمەتكەرىن جىبەرۋ شەشىمىنە كەلدى. يسپانيا بيلىگى كاتالونيا ايماعىنىڭ تاۋەلسىزدىك تۋرالى رەفەرەندۋمىن توقتاتۋعا تىرىسۋدا. كاتالونيانىڭ تاراتىلعان ۇكىمەتى جەكسەنبى كۇنى ايماقتاعى بارلىق مەكتەپتەردى داۋىس بەرۋ ۋچاسكەلەرى رەتىندە پايدالانعالى وتىر. دەگەنمەن، يسپانيا ۇكىمەتىنىڭ ءباسپاسوز حاتشىسى BBC ارناسىنا بەرگەن مالىمەتىندە بۇل رەفەرەندۋمنىڭ زاڭسىز ەكەنىن، ءارى يسپانيا بيلىگى بۇعان جول بەرمەيتىنىن جەتكىزگەن. بۇل تۋرالى BBC-ءدىڭ رەسمي سايتى جازدى.

كاتالونيا ايماعىنىڭ تاراتىلعان ۇكىمەتى بەس جىلدان بەرى يسپانيادان ءبولىنىپ، جەكە مەملەكەت بولۋ ءۇشىن رەفەرەندۋم وتكىزۋدى تالاپ ەتىپ كەلەدى. اپتا سوڭىندا مەكتەپتەر دەمالىسقا تاراعان ۋاقىتتا، كاتالونيانىڭ ۇلتشىل ساياساتكەرلەرى ايماقتاعى بارلىق مەكتەپتەردى رەفەرەندۋمعا داۋىس بەرۋ ورىندارى رەتىندە پايدالانباق. الايدا، يسپانيانىڭ ءباسپاسوز حاتشىسى ينيگو مەندەز دە ۆيگو زاڭسىز سايلاۋعا جول بەرمەيتىندەرىن ايتىپ وتىر.

وتكەن اپتادا كاتالونيانىڭ بىرنەشە رەسمي وكىلدەرى قاماۋعا الىندى. وعان قوسا پوليتسيا تاراۋلارى رەفەرەندۋمعا پايدالانىلاتىن ميلليونداعان پاراقشالاردى تاركىلەدى. ال كاتالونيا ۇكىمەتى رەفەرەندۋم اياقتالىپ، 48 ساعاتتان كەيىن داۋىس بەرۋ ناتيجەسىندە تاۋەلسىزدىك جاريالاۋى مۇمكىن ەكەنىن ايتتى. الايدا، يسپانيا ۇكىمەتى مىڭداعان پوليتسيانى بارسەلونا قالاسىنا جىبەردى. ولار قالانىڭ پورتىنداعى ەكى كەمەدە بۇيرىق كۇتەدى، رەفەرەندۋم وتكىزىلەتىن بولسا، توسقاۋىل جاساۋعا ارەكەتتەنەدى.

“The Qazaq Times”