فوتو: BBC

بۇگىن كاتالونيادا تاۋەلسىزدىك الۋ ماقساتىندا جوسپارلانعان رەفەرەندۋمعا دايىندىقتىڭ سوڭعى كۇنى. كاتالونيانىڭ پرەزيدەنتى كارلس پۋدجەمونت 1 قازان كۇنى بارلىق جەرگىلىكتى تۇرعىنداردى رەفەرەندۋمعا كەلىپ، داۋىس بەرۋگە شاقىردى. بۇل تۋرالى ۆۆس اقپاراتتىق اگەنتتىگى جازدى. 

رەفەرەندۋمدى كونستيتۋتسياعا قايشى كەلەتىن ارەكەت دەپ تاپقان يسپانيا بيلىگى حالىقتىق داۋىس بەرۋ پروتسەسىنە توسقاۋىل بولۋ ءۇشىن، قاۋىپسىزدىك قىزمەتىن كۇشەيتىپ، بارلىق ەل بويىنشا پوليتسيا بەكەتتەرى توتەنشە رەجيمدە جۇمىس ىستەپ جاتىر. Google كاتالونياداعى سايلاۋعا شاقىراتىن ءموبيلدى قوسىمشانى ءوشىرىپ تاستادى.

وتكەن اپتادا بىرنەشە كاتالوندىق شەنەۋنىكتەر ورتالىق بيلىكتىڭ تاپسىرماسىنا قۇلاق اسپاعانى ءۇشىن سوتقا شاقىرىلىپ، داۋىس بەرۋ بيۋللەتەندەرى تاركىلەنگەن بولاتىن. وزدەرىنە جاسالعان قىسىمعا قاراماستان، كاتالوندىقتار ەرتەڭ 2 مىڭعا جۋىق داۋىس بەرۋ بولىمشەلەرى جۇمىس ىستەيتىنىن حابارلادى.

كاتالونيا-يسپانيا قاتىناستارىنان دەرەكتەر

  • كاتالونيادا يسپانيا حالقىنىڭ 16 پايىزى تۇرادى;
  • يسپانيا ەكسپورتىنىڭ 25,6 پايىزى كاتالونياعا تيەسىلى;
  • يسپانيانىڭ ءجىو 19 پايىزى كاتالونيانىڭ ەسەبىنەن تولىعادى;
  • شەتەلدىك ينۆەستيتسيانىڭ 20,7 پايىزى كاتالونياعا كەلەدى;

“The Qazaq Times”