كۇردىستانداعى تۋريستىك قالالار. فوتو: scs.ubbcluj.ro.

يراك ۇكىمەتى كۇرد اۆتونومياسىنا باعىتتالعان بارلىق ساياحاتتارعا تىيىم سالدى.  يراك تۋريزم باسقارماسى شەشىم كۇرد اۆتونومياسىنىڭ دۇيسەنبى كۇنى وتكىزگەن رەفەرەندۋمىنا بايلانىستى جاسالعان شارا ەكەنىن اتاپ ءوتتى. بۇل تۋرالى «اتانولى» اقپاراتتىق اگەنتتىگى حابارلايدى.

يراك تۋريزم باسقارماسىنىڭ توراعاسى ماحمۋد ءال زۇبەيدي: «باعداتتاعى جانە ەلدىڭ وڭتۇستىگى مەن ورتالىق ايماقتارىنداعى تۋريستىك فيرمالاردىڭ يراك كۇرد اۆتونومياسىنداعى قىزمەتى توقتاتىلدى»، - دەپ مالىمدەگەن. ءارى ەل ازاماتتارىنىڭ قازىرگى كەزدە كۇرد اۆتونومياسىنا ساياحاتتاي بارۋدان الاڭدايتىنىن دا ايتىپ ءوتتى.

ماحمۋد ءال زۇبەيدي سوزىندە: «الداعى ۋاقىتتا شەتەلدىك تۋريستىك كومپانيالار جانە اۋە كومپانيالارى دا كۇرد اۆتونومياسىنا باعىتتالعان ساپارلارىن توقتاتاتىن بولادى. بۇل ايماقتىڭ وقشاۋلانۋعا ۇشىراعانىمەن بىردەي. ەندىگى جەردە يراك بۇرىنعىداي كۇرد اۆتونومياسىنا تۋريستەر تارتا المايدى»، - دەدى. ايتا كەتەيىك، تۋريزم – كۇرد اۆتونومياسىنىڭ ەكىنشى تابىس كوزى بولىپ سانالادى.

“The Qazaq Times”